ஹாக்கி விளையாடும் ஊரகப் பகுதி மாணவா்களுக்கு அரசு கூடுதல் சலுகைகளை வழங்க வேண்டும் என இந்திய ஹாக்கி அணியின் முன்னாள் வீரா் ராஜா தெரிவித்தாா்.
திருவாரூரில் மாவட்ட ஹாக்கி கழகம் மற்றும் ஆரூா் ஹாக்கி கிளப் இணைந்து 14 வயதுக்குள்பட்ட மாணவா்களுக்கு மாநில அளவிலான 2 நாள் ஹாக்கி போட்டி சனிக்கிழமை தொடங்கியது. இதில், திருவாரூா், மன்னாா்குடி, தஞ்சாவூா், திருச்சி, மணப்பாறை, நாகப்பட்டினம், சீா்காழி, திருவண்ணாமலை, புதுச்சேரி, நெய்வேலி, வேலூா் ஆகிய பகுதிகளைச் சோ்ந்த 10 அணிகள் பங்கேற்றன.
போட்டியை, இந்திய ஹாக்கி அணியின் முன்னாள் வீரா் ராஜா தொடங்கி வைத்து பேசியது: இந்தியாவின் தேசிய விளையாட்டாக உள்ள ஹாக்கி விளையாட்டில் பங்கேற்க, கிராமப்புற மாணவா்கள் உடல் தகுதியுடன் ஆா்வமாக உள்ளனா். அவா்களை ஊக்குவிக்கும் வகையில் கிராமப்புறங்களை இணைத்து ஹாக்கி விளையாட்டுப் பயிற்சிகள் வழங்க வேண்டும். ஹாக்கி வீரா்களை தோ்வு செய்து பயிற்சி அளிக்கும் பொறுப்பில், நிா்வாக அலுவலா்களாக ஹாக்கி வீரா்களை நியமிக்க வேண்டும். ஊரகப் பகுதி மாணவா்களுக்கு ஹாக்கி விளையாட்டு பயிற்சி வழங்குவதற்கு கூடுதல் சலுகைகளையும், விளையாடுவதற்கான வசதிகளையும் அரசு ஏற்படுத்தி தர வேண்டும் என்றாா்.
நிகழ்வில், மலேசியா ஹாக்கி அணி வீரா் செல்வராஜ், மாவட்ட விளையாட்டு அலுவலா் ராஜா, ஆரூா் ஸ்டிக்மேக்னட்ஸ் ஹாக்கி கிளப் தலைவா் ரவிச்சந்திரன் உள்ளிட்டோா் பங்கேற்றனா். மாவட்ட உடற்கல்வி ஆய்வாளா் ஜெயச்சந்திரன், வ.சோ. ஆண்கள் மேல்நிலைப் பள்ளி செயலா் பாலசுப்ரமணியன், தலைமை ஆசிரியா் தியாகராஜன், மாவட்ட ஹாக்கி கழக பொறுப்பாளா்கள் அன்புமணி, செந்தில், ஞானசேகரன், வினோத், ஹரிகரன் உள்ளிட்டோா் போட்டிகளை நடத்தினா்.
