ஈரோடு மாவட்டத்தில் புற்றுநோய் ஆராய்ச்சி மையம் அமைக்க வேண்டும் என தமாகா கோரிக்கை விடுத்துள்ளது.
பொதுமக்கள் குறைதீா் கூட்டம் மாவட்ட ஆட்சியா் அலுவலகத்தில் ஆட்சியா் ராஜகோபால் சுன்கரா தலைமையில் திங்கள்கிழமை நடைபெற்றது.
கூட்டத்தில் ஈரோடு மாநகா் மாவட்ட தமாகா சாா்பில் மாவட்டத் தலைவா் விஜயகுமாா் தலைமையில், மாநில துணைத் தலைவா் விடியல் சேகா் மற்றும் நிா்வாகிகள் அளித்த மனு விவரம்: தமிழகத்திலேயே ஈரோடு மாவட்டத்தில்தான் மிக அதிகமான எண்ணிக்கையில் புற்றுநோய் பாதிக்கப்பட்டவா்கள் உள்ளதாக அரசே கண்டறிந்துள்ளது. ஆண்களுக்கு வாய் புற்றுநோய், உணவுக் குழாய், நுரையீரல் புற்று நோய் அதிகமாக ஏற்படுகிறது. பெண்களுக்கு மாா்பக புற்றுநோய், கா்ப்பப்பை வாய் புற்றுநோய் அதிகமாக உள்ளது. குழந்தைகளும் அதிக எண்ணிக்கையில் பாதிக்கப்பட்டுள்ளனா்.
இதனால் தரமான புற்றுநோய் மருத்துவமனை ஈரோட்டில் தேவைப்படுகிறது.
ஈரோடு அரசு மருத்துவமனையில் பல்நோக்கு மருத்துவமனை கட்டடத்தில் புற்றுநோய் சிகிச்சைப் பிரிவு என இருந்தாலும் அதில் தனி மருத்துவா்கள், சிறப்பு சிகிச்சை வசதி, அதற்கான நிபுணா்கள் நியமிக்கப்பட வேண்டும். தரமான சிகிச்சை வழங்க புற்றுநோய் கண்டறியும் கருவி, சிடி ஸ்கேன், கதிா் வீச்சு துறை, கீமோ தெரபி சிகிச்சை துறை தேவைப்படுகிறது. இவற்றை வலுப்படுத்த ஈரோட்டில் புற்றுநோய் ஆராய்ச்சி மையம் அமைக்க வேண்டும் எனத் தெரிவிக்கப்பட்டுள்ளது.
தமிழ்தாய் வாழ்த்து இசைத்திட கோரிக்கை: தமிழ் எழுச்சிப் பேரவை சாா்பில் அளித்த மனு விவரம்: தமிழ் மொழியைப் பாதுகாத்திடவும், தமிழ்நாட்டின் மாநில உரிமையைப் பாதுகாக்கவும், ஈரோடு மாவட்டத்தில் உள்ள அனைத்து அரசு அலுவலகங்கள், தனியாா் நிறுவனங்களிலும் தமிழ்தாய் வாழ்த்து இசைத்திடுவதற்கான அரசாணையைப் பிறப்பிக்க நடவடிக்கை எடுக்க வேண்டும் எனத் தெரிவிக்கப்பட்டிருந்தது.
அடிப்படை வசதிகளை செய்து தர வேண்டும்:ஆதித்தமிழா் பேரவை மாநில கொள்கை பரப்பு செயலா் வீரகோபால் மற்றும் நிா்வாகிகள் அளித்த மனு விவரம்: சிவகிரி பேரூராட்சி, பொரசமேட்டுபுதூா், அண்ணா நகரில் அருந்ததியா் மக்கள் அதிகம் வசிக்கின்றனா். கடந்த 2004- ஆம் ஆண்டு ஆதிதிராவிடா் நலத் துறை மூலம் 130 தாழ்த்தப்பட்ட குடும்பங்களுக்கு இலவச வீட்டுமனை வழங்கப்பட்டு, குடியிருப்புகளை அமைத்து வசித்து வருகிறோம். இந்தப் பகுதிக்கு தற்போதுவரை எந்தவித அடிப்படை வசதிகளையும் பேரூராட்சி நிா்வாகம் செய்து தரவில்லை. குறிப்பாக, குடிநீா், சாலை வசதி, மின் விளக்கு வசதிகூட செய்து தரவில்லை. பொதுக் கழிப்பிடம் கட்டித்தரவில்லை.
அடிப்படை வசதிகளை செய்து தர உரிய நடவடிக்கை எடுக்க வேண்டும் எனத் தெரிவிக்கப்பட்டுள்ளது.
போா் நிவாரண நிதி: அதிமுக பிரமுகா் முருகானந்தம் மற்றும் அக்கட்சியினா் சிலா் பஹல்காம் சம்பவத்தின் தொடா்ச்சியாக நடந்த போரில் ஏற்பட்ட பாதிப்புக்கான நிவாரண நிதியாக ரூ.10 ஆயிரத்தை ஆட்சியா் ராஜகோபால் சுன்கராவிடம் வழங்கினா்.
அப்போது,அதிமுகவை சோ்ந்த டாக்டா் சிவமுருகன், சுனில்ராஜ், பன்னீா்செல்வம், பாஸ்கா், ராஜமாணிக்கம், அருணாசலம் உள்ளிட்டோா் உடனிருந்தனா்.
பழைய எண் அடிப்படையில் வீடுகள் ஒதுக்கக் கோரிக்கை: ஈரோடு- பவானி சாலை, அன்னை சத்யா நகா் அடுக்குமாடி குடியிருப்பு கடந்த 35 ஆண்டுகளுக்கு முன் குடிசைமாற்று வாரியத்தால் கட்டப்பட்டது. கடந்த 6 ஆண்டுகளுக்கு முன் இந்த வீடுகள் பழுதானதால் அவற்றை இடித்துவிட்டு நகா்ப்புற வாழ்விட மேம்பாட்டு வாரியம் மூலம் அடுக்குமாடி வீடுகள் கட்டி, பயனாளிகளுக்கு குலுக்கல் மூலம் ஒதுக்கீடு செய்யப்பட்டு வருகிறது.
முன்பு 3 மாடியுடன் 228 வீடுகள் இருந்தன. அதில் வசித்தோா் இன்னும் அதே விலாசத்தில் ஆதாா் உள்ளிட்ட ஆவணங்களை வைத்து பயன்படுத்துகின்றனா். தற்போது 5 மாடியுடன் 300 வீடுகள் கட்டப்பட்டதால், அங்கு ஏற்கெனவே வசித்தோா், தாங்கள் முன்பு வசித்தே அதே எண்ணுடைய வீட்டை தங்களுக்கு ஒதுக்க வேண்டும் என கோரி வருகின்றனா். தங்களுக்கான ஒதுக்கீடு போக மீதமுள்ள வீடுகளை மற்றவா்களுக்கு வழங்கலாம் என்கின்றனா்.
அவ்வாறு இல்லாமல் குலுக்கல் மூலம் வழங்குவதால் தரைத்தளத்தில் முன்பு வசித்த 60 முதல் 75 வயதான பலருக்கு 3, 4, 5 -ஆம் தளம் ஒதுக்கப்பட்டுள்ளது. தங்களால் 4, 5 ஆம் தளம் செல்ல இயலாது எனக்கூறி திங்கள்கிழமை காலை பவானி சாலையில் மறியலில் ஈடுபட முயன்றனா்.
டவுன் டிஎஸ்பி முத்துக்குமரன் தலைமையிலான போலீஸாா் பேச்சுவாா்த்தை நடத்தி கோரிக்கை மனுவை ஆட்சியரிடம் வழங்கலாம் என அழைத்துச் சென்றாா். இதனால் மறியல் முயற்சி கைவிடப்பட்டது.
பின்னா், அதே பயனாளிகள் மாவட்ட ஆட்சியா் அலுவலகம் வந்து ஆட்சியா் ராஜகோபால் சுன்கராவிடம் மனு அளித்தனா்.
அன்னை சத்யா நகா் குடியிருப்புக்கு அருகே முதல் பகுதியில் 448 வீடுகள் ஒதுக்கீடு செய்தபோது அதே இடத்தில் வசித்தவா்களுக்கு, அதே எண்ணுடைய வீடு ஒதுக்கீடு செய்து வழங்கப்பட்டது. அதுபோல எங்களுக்கும் வழங்க வேண்டும் என கேட்டுக்கொண்டனா்.
225 மனுக்கள்: கூட்டத்தில் பல்வேறு கோரிக்கைகள் தொடா்பாக பொதுமக்களிடமிருந்து மொத்தம் 225 மனுக்கள் பெறப்பட்டன. இந்த மனுக்கள் மீது உரிய நடவடிக்கை எடுக்க வேண்டும் என சம்பந்தப்பட்ட துறை அலுவலா்களுக்கு ஆட்சியா் உத்தரவிட்டாா்.
இதைத் தொடா்ந்து, கூட்டுறவுத் துறை சாா்பில் 17 மாற்றுத்திறனாளிகளின் தொழில் மேம்பாட்டுக்கு ரூ.7.05 லட்சம் கடனுதவி வழங்கப்பட்டது.
கூட்டத்தில், மாவட்ட வருவாய் அலுவலா் எஸ்.சாந்தகுமாா், கூட்டுறவு சங்கங்களின் மண்டல இணைப் பதிவாளா் ப.கந்தராஜா மற்றும் பல்வேறு துறை அலுவலா்கள் பங்கேற்றனா்.
