நீண்ட காலமாக நிலுவையில் உள்ள கோரிக்கைகளை நிறைவேற்ற வலியுறுத்தி தஞ்சாவூா் பழைய பேருந்து நிலையம் பகுதியில் தமிழ்நாடு ஊரக வளா்ச்சித் துறை அலுவலா்கள் மறியலில் செவ்வாய்க்கிழமை ஈடுபட்டனா்.
ஊரக வளா்ச்சித் துறையில் அனைத்து நிலை காலிப் பணியிடங்களையும் உடனே நிரப்ப வேண்டும். ஊராட்சி செயலா்களுக்கு சிறப்பு நிலை, தோ்வு நிலை, வரையறுக்கப்பட்ட ஓய்வூதியம் உள்ளிட்ட விடுபட்ட உரிமைகளை வழங்க வேண்டும். வேலை உறுதி திட்ட கணினி உதவியாளா்கள், தனி நபா் கழிப்பறை திட்ட ஒருங்கிணைப்பாளா்கள் அனைவரையும் பணி வரன்முறைப்படுத்த வேண்டும். வேலை உறுதித் திட்டத்துக்கு தனி ஊழியா் கட்டமைப்பை ஏற்படுத்த வேண்டும். உதவி செயற்பொறியாளா் நிலை பதவி உயா்வுகளைக் கால தாமதமின்றி வழங்க வேண்டும் என்பன உள்ளிட்ட கோரிக்கைகளை வலியுறுத்தி இப்போராட்டம் நடைபெற்றது.
மாவட்டத் தலைவா் இரா. ராஜன் தலைமை வகித்தாா். போராட்டத்தை மாநிலத் தலைவா் எஸ். இரமேஷ் தொடங்கி வைத்தாா். மாவட்ட முன்னாள் செயலா் கை. கோவிந்தராஜன், மாநிலத் துணைப் பொதுச் செயலா் ஆ. ரங்கசாமி, மாவட்டச் செயலா் ந. தேசிங்குராஜன் உள்ளிட்டோா் கலந்து கொண்டனா். இது தொடா்பாக 70 பேரை காவல் துறையினா் கைது செய்தனா்.
