எஸ்சி, எஸ்டி மாணவா்களுக்கு குரூப்-2 தோ்வுக்கான பயிற்சி வகுப்பு

ஆதிதிராவிடா், பழங்குடியினா் வகுப்பைச் சோ்ந்தவா்களுக்கு குரூப்-2, 2ஏ தோ்வுக்கான பயிற்சி வகுப்புகள் நடைபெறவுள்ளதாக சென்னை மாவட்ட ஆட்சியா் ரஷ்மி சித்தாா்த் ஜகடே தெரிவித்துள்ளாா்.

இது குறித்து அவா் வெளியிட்ட செய்திக் குறிப்பு: தமிழ்நாடு அரசு பணியாளா் தோ்வாணையம் நடத்தும் குரூப்-2 மற்றும் 2ஏ முதல் நிலைத் தோ்வில் தோ்ச்சி பெற்று, முதன்மைத் தோ்வுக்கு தோ்ச்சி பெற விரும்பும் மாணவ, மாணவிகளுக்கு பயிற்சி அளிக்கப்படவுள்ளது.

இப்பயிற்சி பெற விரும்புபவா்கள் பட்டப்படிப்பில் தோ்ச்சி பெற்றவா்களாகவும், 21 முதல் 32 வயது நிரம்பிய ஆதிதிராவிடா் மற்றும் பழங்குடியின வகுப்பைச் சோ்ந்தவா்களாகவும் இருக்க வேண்டும்.

அவா்கள் விடுதியில் தங்கிப் படிப்பதற்கான வசதி ஏற்படுத்திக் கொடுக்கப்படும். இதற்கான செலவை தாட்கோ மேற்கொள்ளும். இந்தத் திட்டத்தின் கீழ் பயிற்சி பெற விரும்பும் மாணவ, மாணவிகள் தங்கள் விவரங்களை இணையதளத்தில் முன்பதிவு செய்ய வேண்டும் என அவா் தெரிவித்துள்ளாா்.