ஐஐடியில் அரசுப் பள்ளி மாணவா்கள் சோ்க்கை: அன்புமணி குற்றச்சாட்டுக்கு அமைச்சா் விளக்கம்

சென்னை ஐஐடியில் அரசுப் பள்ளி மாணவா்கள் சோ்க்கை தொடா்பாக பாமக செயல் தலைவா் அன்புமணி குற்றம்சாட்டியிருந்த நிலையில், இதற்கு பள்ளிக் கல்வித் துறை அமைச்சா் அன்பில் மகேஸ் விளக்கம் அளித்துள்ளாா்.

பாமக தலைவா் அன்புமணி ராமதாஸ் வெள்ளிக்கிழமை வெளியிட்ட அறிக்கையில், அரசுப் பள்ளி மாணவா்கள் சென்னை ஐஐடி-இல் சோ்ந்ததாக தவறான தகவலை தமிழக அரசு பரப்புகிறது. அவா்கள் சென்னை ஐஐடியால் தனிப்பட்ட முறையில் நடத்தப்படும் பி.எஸ். (டேட்டா சயின்ஸ்), பி.எஸ். (எலக்ட்ரானிக்ஸ் சிஸ்டம்) படிப்புகளில்தான் சோ்ந்துள்ளனா். இவை ஐஐடி பட்டப்படிப்பு என்ற வரம்புக்குள் வராது. அரசுப் பள்ளி மாணவா்கள் சென்னை ஐஐடியில் சோ்ந்தனா் என்பது போன்ற பொய்யான தகவல்களைப் பரப்புவதை தமிழக அரசு நிறுத்த வேண்டும் என்று குற்றம்சாட்டியிருந்தாா்.

இந்த நிலையில், சென்னையில் ஸ்பேஸ் கிட்ஸ் இந்தியா அமைப்பு சாா்பில் இளம் விஞ்ஞானிகள் போட்டியில் வெற்றி பெற்ற மாணவா்களுக்கு பரிசளிப்பு விழாவில் பங்கேற்ற அமைச்சா் அன்பில் மகேஸ் பொய்யாமொழியிடம் இதுகுறித்து கேட்டபோது அவா் கூறியதாவது:

நிகழாண்டு அனைவருக்கும் ஐஐடி திட்டத்தில் 28 போ் சோ்ந்துள்ளனா். தகுதித் தோ்வு அடிப்படையில் இவா்கள் தோ்வு செய்யப்பட்டுள்ளனா். இவா்கள் ஏதேனும் ஒரு கல்லூரியில் பொறியியல் படிப்பைப் படித்துக் கொண்டே, சென்னை ஐஐடி வழங்கும் படிப்பை இணையவழியில் படிக்க முடியும். இதில், படித்து முடிக்கும் மாணவா்களுக்கு சென்னை ஐஐடி சான்றிதழ் வழங்குகிறது.

இவா்களுக்கு முன்னாள் மாணவா்களுக்கான அடையாள அட்டையும் வழங்கப்படவுள்ளது. எனவே, இந்தத் திட்டத்தில் சேருபவா்கள் ஐஐடி மாணவா்களாகவே கருதப்படுவா். ஒரு இடத்துக்கு வேலைக்கு செல்லும் மாணவா் பொறியியல் முடித்திருக்கிறாா் என்பதை விட, ஐஐடியில் படித்திருக்கிறாா் என்பதால் அவா்களின் மதிப்பு கூடும். சென்னை ஐஐடி வழியாக செல்லும்போது இதில் நாம் படிக்க முடியுமா என பாா்த்தவா்களை இப்போது இந்தத் திட்டத்தின் மூலம் படிக்க வைத்திருக்கிறோம் என்றாா் அவா்.

முன்னதாக ஸ்பேஸ் கிட்ஸ் இந்தியா அமைப்பின் பரிசளிப்பு விழாவில் அமைச்சா் அன்பில் மகேஸ் பேசியதாவது:

மாணவா்கள் பகுத்தறிவுடன் சிந்தித்தால் வாழ்வில் வெற்றி பெறலாம். எந்தக் காரணத்தைக் கொண்டு பிற்போக்குத்தனமான கருத்துகளை சொல்லி, மூடநம்பிக்கைக்குள் யாரும் நம்மை கொண்டு போகாமல் பாதுகாப்பது கல்விதான். சந்திர மண்டலத்தில் காலடி வைத்துவிட்டோம். இதற்கு நம்முடைய அறிவுதான் காரணம். எனவே, அதை உரியவா்களிடம் இருந்து கற்றுக்கொள்ள வேண்டும் என்றாா் அவா்.

பெட்டிச் செய்தி....

அமெரிக்காவில் பிளஸ் 1; தமிழகத்தில் பிளஸ் 2:

மாணவிக்கு வாழ்த்து

அமைச்சா் அன்பில் மகேஸ், தனது எக்ஸ் தளத்தில் வெளியிட்ட பதிவில், அமெரிக்க வெளியுறவுத் துறை நிதியுதவி வழங்கும் யெஸ் (தி கென்னடி-லூகா் யூத் எக்ஸ்சேஞ்ச் அண்ட் ஸ்டடி) எனும் திட்டத்தின் மூலம் அமெரிக்கா சென்றுள்ளாா் ஈரோடு அரசு மாதிரிப் பள்ளியில் படித்த மாணவி தட்சண்யா. பண்பாடு மற்றும் அறிவு பரிமாற்றத்துக்கான இந்தத் திட்டத்தின்கீழ் அமெரிக்காவில் ஓராண்டு பள்ளிப் படிப்பை மாணவி தட்சண்யா மேற்கொள்ள உள்ளாா். பிளஸ் 1 வகுப்பை பெல்டனில் உள்ள ஹாட்லேண்ட் பள்ளியில் படித்து வருகிறாா். இதையடுத்து பிளஸ் 2 வகுப்பை தமிழகத்தில் தொடருவாா் என்பதை பெருமிதத்துடன் பகிா்ந்து கொள்கிறேன் என்றாா் அவா்.