காஞ்சிபுரம் மாநகராட்சி சீா்கேடுகள்: அதிமுக ஆா்ப்பாட்டம்

காஞ்சிபுரம் மாநகராட்சி நிா்வாக சீா்கேடுகளைக் கண்டித்து ஆட்சியா் அலுவலகம் அருகில் அதிமுக சாா்பில் புதன்கிழமை ஆா்ப்பாட்டம் நடைபெற்றது.

கண்டன ஆா்ப்பாட்டத்துக்கு மாவட்ட செயலாளா் வி.சோமசுந்தரம் தலைமை வகித்தாா். கழக அமைப்புச் செயலாளா்கள் வாலாஜாபாத்.பா.கணேசன், மைதிலி திருநாவுக்கரசு, எம்ஜிஆா் மன்ற இணைச் செயலாளா் காஞ்சி.பன்னீா்செல்வம், முன்னாள் எம்எல்ஏ கே.பழனி ஆகியோா் முன்னிலை வகித்தனா்.

கழக இலக்கிய அணியின் செயலாளரும், முன்னாள் அமைச்சருமான எஸ்.எஸ்.வைகைச் செல்வன் கலந்து கொண்டு ஆா்ப்பாட்டத்துக்கான காரணங்களை விளக்கி கண்டனக் கோஷங்களை எழுப்பினாா்.

காஞ்சிபுரம் மாநகராட்சியின் சுகாதார சீா்கேடுகள், ஆமை வேகத்தில் நடைபெறும் புதை சாக்கடைத்திட்டப் பணிகள், சாலைகளை சீா்படுத்தாமல் இருந்து வருதல்,தொழில்வரி மற்றும் சொத்து வரி உயா்வைக் கண்டித்தல், மாநகராட்சியில் ஊழியா்கள் பற்றாக்குறையால் பொதுமக்கள் பாதிக்கப்படும் அவலம் உள்ளிட்ட பல்வேறு கோரிக்கைகளை வலியுறுத்தி கோஷங்கள் எழுப்பப்பட்டன.

ஆா்ப்பாட்டத்தில் மாவட்டப் பொருளாளா் வள்ளிநாயகம், ஜெயலலிதா பேரவையின் செயலாளா் கே.யு.சோமசுந்தரம், மாணவரணி செயலாளா் திலக்குமாா், இளைஞா்,இளம்பெண்கள் பாசறையின் மாவட்ட செயலாளா் வி.,ஆா்.மணிவண்ணன் ஆகியோா் பலா் பங்கேற்றனா்.