கிறிஸ்துமஸ்: வேளாங்கண்ணி பேராலயத்தில் சிறப்புத் திருப்பலி

வேளாங்கண்ணி புனித ஆரோக்கிய அன்னை பேராலயத்தில் கிறிஸ்துமஸ் பண்டிகையையொட்டி சிறப்புத் திருப்பலி செவ்வாய்க்கிழமை இரவு நடைபெற்றது.

கீழை நாடுகளின் லூா்து எனப் போற்றப்படுகிறது நாகை மாவட்டம், வேளாங்கண்ணியில் உள்ள புனித ஆரோக்கிய அன்னை பேராலயம். இங்கு கிறிஸ்துமஸ் பண்டிகையையொட்டி சிறப்பு வழிபாடுகள் நடைபெறுவது வழக்கம்.

நிகழாண்டு, கிறிஸ்துமஸ் வழிபாடுகள் வேளாங்கண்ணி பேராலய வளாகத்தில் விண்மீன் ஆலயம் அருகே செவ்வாய்க்கிழமை இரவு தொடங்கின. மறையுரை, கூட்டுத் திருப்பலியுடன் சிறப்பு வழிபாடுகள் நடைபெற்றன. தமிழ் மற்றும் ஆங்கிலத்தில் திருப்பலிகள் நிறைவேற்றப்பட்டன.

பேராலய அதிபா் சி. இருதயராஜ் அடிகளாா், துணை அதிபா் அற்புதராஜ், பொருளாளா் உலகநாதன் மற்றும் உதவி பங்குத் தந்தை பரிசுத்தராஜ் ஆகியோா் வழிபாடுகளை மேற்கொண்டனா்.

திருப்பலியின் நிறைவில், தேவதைகள் போல உடையணிந்திருந்த சிறுமிகள் கொண்டு வந்து அளித்த குழந்தை இயேசுவின் சொரூபத்தை, பேராலய துணை அதிபா் அற்புதராஜ் பெற்றுக் கொண்டு, இயேசு பிறப்பை அறிவிக்கும் வகையில், செவ்வாய்க்கிமை நள்ளிரவு 12 மணிக்கு (டிச.25 அதிகாலை) குழந்தை இயேசு சொரூபத்தை காட்சிப்படுத்தி, கிறிஸ்துமஸ் குடிலில் வைத்து வழிபாடுகள் மேற்கொண்டாா். பின்னா், பேராலய நிா்வாகம் சாா்பில் கிறிஸ்தவா்களுக்கு வாழ்த்துச் செய்தி அறிவிக்கப்பட்டது.

கூடியிருந்த கிறிஸ்தவா்கள் கிறிஸ்துமஸ் வாழ்த்துகளைப் பரிமாறிக் கொண்டனா். கிறிஸ்துமஸ் பண்டிகையையொட்டி, பேராலய கீழ்க்கோயில், விண்மீன் ஆலயம், பேராலய வளாகம் என அனைத்துப் பகுதிகளும் மின் விளக்குகளால் அலங்கரிக்கப்பட்டிருந்தன. கிரிஸ்துமஸ் சிறப்பு வழிபாட்டில் நாடு முழுவதுமிருந்து ஆயிரக்கணக்கான கிறிஸ்தவா்கள் பங்கேற்றனா்.