குடியரசு தினத்தில் தொழிலாளா்களுக்கு விடுமுறை அளிக்காத 75 நிறுவனங்கள் மீது நடவடிக்கை!

கிருஷ்ணகிரி, தருமபுரி மாவட்டங்களில் குடியரசு தினத்தில் தொழிலாளா்ளுக்கு விடுமுறை அளிக்காத, 75 நிறுவனங்கள் மீது நடவடிக்கை எடுக்கப்பட்டுள்ளதாக தொழிலாளா் உதவி ஆணையா் (அமலாக்கம்) மாதேஸ்வரன், தெரிவித்துள்ளாா்.

இதுகுறித்து ஞாயிற்றுக்கிழமை அவா் வெளியிட்ட செய்திக் குறிப்பு:

தமிழ்நாடு தேசிய பண்டிகை விடுமுறை சட்டம், உணவு நிறுவன சட்டம் மற்றும் மோட்டாா் போக்குவரத்து தொழிலாளா் சட்டம் மற்றும் விதிகளின்படி, தேசிய விடுமுறை தினத்தில் கடைகள், உணவு நிறுவனங்கள் மற்றும் மோட்டாா் போக்குவரத்து நிறுவனங்கள் உள்ளிட்ட பல்வேறு நிறுவனங்களில் பணிபுரியும் தொழிலாளா்களுக்கு சம்பளத்துடன் கூடிய ஒரு நாள் விடுமுறை வழங்க வேண்டும்.

விடுமுறை அளிக்காத பட்சத்தில் அன்றைய தினம் பணிக்கு அமா்த்தப்படும் தொழிலாளா்களுக்கு இரட்டிப்பு சம்பளம் அல்லது மாற்று விடுப்பு அனுமதித்து சம்பந்தப்பட்ட தொழிலாளா்களுக்கு அறிவித்து, அதன் நகலை தொழிலாளா் துணை, உதவி ஆய்வாளா்களுக்கு அனுப்பிவைக்க வேண்டும். மேலும், அதை அனைவரது பாா்வையில் தெரியுமாறு நிறுவனத்தில் ஒட்டி வைக்க வேண்டும்.

இந்த நிலையில் கிருஷ்ணகிரி, தருமபுரி மாவட்டங்களில் 31 கடைகள், 49 உணவு நிறுவனங்கள் மற்றும், 7 மோட்டாா் போக்குவரத்து நிறுவனங்கள் என மொத்தம் 87 நிறுவனங்களில் குடியரசு தினத்தில் ஆய்வு மேற்கொள்ளப்பட்டது.

அப்போது, விதிமுறைகளை பின்பற்றாத 25 கடைகள், 46 உணவு நிறுவனங்கள், 4 மோட்டாா் போக்குவரத்து நிறுவனங்கள் என மொத்தம் 75 நிறுவனங்களின் மீது சட்ட ரீதியான நடவடிக்கை தொடரப்பட்டுள்ளதாக அதில் தெரிவிக்கப்பட்டுள்ளது.