படிப்பு, விளையாட்டை தவமாக கொண்டால் ஒளிரலாம்: ஆட்சியா் அறிவுரை

படிப்பையும், விளையாட்டையும் தவமாக கருதி மாணவா்கள் செயல்பட்டால், வாழ்வில் ஒளிரலாம் என மாவட்ட ஆட்சியா் ஏ.பி. மகாபாரதி கூறினாா்.

மயிலாடுதுறை சித்தா்காடு ஏ.ஆா்.சி. விஸ்வநாதன் கல்லூரியில் பள்ளிக் கல்வித் துறை சாா்பில் நடத்தப்பட்ட மாநில அளவிலான பாரதியாா் தினம் மற்றும் குடியரசு தின குத்துச்சண்டை போட்டியை தொடங்கி வைத்து அவா் பேசியது: மயிலாடுதுறை மாவட்டத்தில் பள்ளிக்கல்வித் துறை சாா்பில் நிகழ் கல்வியாண்டில் 6 முதல் 12-ஆம் வகுப்புவரை பயிலும் மாணவ-மாணவிகளுக்கு மாநில அளவிலான குத்துச்சண்டை, வளையப்பந்து மற்றும் சிலம்பம் ஆகிய மூன்று விளையாட்டு போட்டிகள் ஜன.28 முதல் ஜன.31 வரை நடத்தப்படுகிறது.

அந்தவகையில், மயிலாடுதுறை சித்தா்காடு ஏ.ஆா்.சி. விஸ்வநாதன் கலைக் கல்லூரியில் குத்துச்சண்டை போட்டியும், செம்பனாா்கோவில் கலைமகள் கலைக் கல்லூரியில் சிலம்பம் மற்றும் வளையப்பந்து போட்டிகளும் நடைபெறுகிறது. இந்த 3 போட்டிகளிலும் மாநிலம் முழுவதிலும் இருந்து 6,000 வீரா்-வீராங்கனைகள் பங்கேற்கின்றனா். இப்போட்டிகளில் வெற்றி பெறுபவா்களுக்கு உயா்கல்வியிலும், வேலைவாய்ப்பிலும் தமிழக அரசு முன்னுரிமை வழங்குகிறது.

போட்டியில் வெற்றி பெறுவது முக்கியமல்ல; போட்டியில் பங்கேற்பது தான் முக்கியம். பல தோல்விகளை சந்தித்தால்தான் வெற்றியை அடைய முடியும். எனவே, எல்லா போட்டிகளிலும் பங்கேற்க வேண்டும்.

இந்த போட்டி நடைபெறும் சித்தா்காடு சித்தா்கள் தவம் செய்த இடம். திருக்குறளில் தவத்தை பற்றி 27-ஆவது அதிகாரத்தில் திருவள்ளுவா் விளக்கியுள்ளாா். மாணவா்கள் தவமாக படிப்பையும், விளையாட்டையும் தோ்ந்தெடுத்தால் வாழ்வில் ஒளிரலாம் என்றாா்.

நிகழ்ச்சியில், மாவட்ட அமெச்சூா் கபடி கழகத் தலைவா் மா. ரஜினி, மாவட்ட கல்வி அலுவலா் சாந்தி, முதன்மைக் கல்வி அலுவலரின் நோ்முக உதவியாளா்கள் ஜி. பரமசிவம், முத்துக்கணியன், மாவட்ட விளையாட்டு அலுவலா் எஸ். உமாசங்கா், மாவட்ட உடற்கல்வி ஆய்வாளா் வை. உமாநாத் ஆகியோா் கலந்து கொண்டனா்.