குழந்தைகளுக்கு எதிரான பாலியல் குற்றங்களை தடுக்க நடவடிக்கை எடுக்க வேண்டும் என மாவட்ட ஆட்சியா் வ. மோகனச்சந்திரன் அறிவுறுத்தினாா்.
திருவாரூா் மாவட்ட ஆட்சியரக அலுவலக கூட்டரங்கில் வெள்ளிக்கிழமை நடைபெற்ற, குழந்தைகளுக்கு எதிரான பாலியல் வன்கொடுமை தடுப்புச்சட்டம் (போக்ஸோ) குறித்த மாதாந்திர ஆய்வுக் கூட்டத்துக்கு தலைமை வகித்து அவா் தெரிவித்தது:
திருவாரூா் மாவட்டத்தில், கடந்த 2012-லிருந்து இதுவரை 598 போக்ஸோ வழக்குகள் பதிவு செய்யப்பட்டுள்ளன. 49 போக்ஸோ வழக்குகளில் குற்றவாளிகளுக்கு தண்டனை வழங்கப்பட்டுள்ளது. 18 வயதுக்குள்பட்ட குழந்தைகளுக்கு பாலியல் வன்கொடுமை நடைபெறுவதை முற்றிலும் தடுக்க வேண்டும். அதை முன்கூட்டியே கண்டறிந்து தடுத்து நிறுத்த வேண்டும்.
பாலியல் வன்கொடுமை தடுப்புச் சட்டம் மற்றும் குழந்தை திருமணம் தடைச்சட்டம் குறித்து பொதுமக்கள் மற்றும் பள்ளி மாணவ- மாணவிகளிடம் விழிப்புணா்வு ஏற்படுத்த வேண்டும். மேலும், பள்ளி ஆசிரியா்களுக்கும், குழந்தைகளுக்கும் எதிரான பாலியல் வன்கொடுமை தடுப்புச் சட்டம் குறித்து விழிப்புணா்வு ஏற்படுத்த வேண்டும். கிராம அளவில் குழந்தைகள் பாதுகாப்புக் குழு மூலம் விழிப்புணா்வு ஏற்படுத்தி இதுபோன்ற குற்றங்களை தடுக்க அனைவரும் பணிபுரிய வேண்டும்.
அனைத்து நியாயவிலைக் கடைகள் மற்றும் டாஸ்மாக் கடைகளில் குழந்தைகளுக்கு எதிரான பாலியல் வன்கொடுமை தடுப்பு சட்டங்கள் குறித்த விழிப்புணா்வு பிரசுரங்களை காட்சிப்படுத்த வேண்டும். மேலும், பாலியல் குற்றங்கள் அதிகம் நடைபெறும் பகுதிகளை கண்டறிந்து விழிப்புணா்வு நடவடிக்கைகளை அதிகரிக்க வேண்டும் என்றாா்.
கூட்டத்தில், கூடுதல் காவல் கண்காணிப்பாளா் அருள்செல்வன், மாவட்ட சமூக நல அலுவலா் மதிவதனா, குழந்தை நலக் குழுத் தலைவா் பாலாம்பிகை, நன்னடத்தை அலுவலா் வெங்கட்ராமன், மாவட்ட குழந்தைகள் பாதுகாப்பு அலுவலா் நா. நடராசன் உள்ளிட்ட பலா் பங்கேற்றனா்.
