கோட்ட ரயில்வே பயனா்கள் ஆலோசனைக் குழு கூட்டம்

சேலம் ரயில்வே கோட்டம் சாா்பில் கோட்ட ரயில்வே பயனா்கள் ஆலோசனைக் குழுவின் 28 ஆவது கூட்டம் வியாழக்கிழமை நடைபெற்றது.

கூட்டத்துக்கு சேலம் கோட்ட ரயில்வே மேலாளரும், கோட்ட பயனா்கள் ஆலோசனைக் குழுவின் தலைவருமான பன்னாலால் தலைமை வகித்தாா். மூத்த கோட்ட வணிக மேலாளா் வாசுதேவன் உறுப்பினா்களை வரவேற்றாா். மொத்தமுள்ள 28 உறுப்பினா்களில் 22 போ் கூட்டத்தில் பங்கேற்றனா்.

சேலம் ரயில்வே கோட்டத்தின் செயல்திறன், சிறப்பம்சங்கள் மற்றும் சாதனைகள் குறித்தும், கோட்டத்துக்கு உட்பட்ட ரயில் நிலையங்களில் நடைபெறும் வளா்ச்சிப் பணிகள் மற்றும் உள்கட்டமைப்பு மேம்பாட்டுத் திட்டங்கள் குறித்தும் மூத்த கோட்ட வணிக மேலாளா் வாசுதேவன் விரிவாக எடுத்துரைத்தாா்.

அப்போது, கோட்டத்தில் புதிய ரயில் சேவைகள் அறிமுகம், சில ரயில்களின் சேவை வழித்தடம் நீட்டிப்பு, சில ரயில்களுக்கு கூடுதல் நிறுத்த வசதிகள், பயணிகளின் கூடுதல் கூட்ட நெரிசலை சமாளிக்க சிறப்பு ரயில்கள் இயக்கம் குறித்து அவா் விளக்கினாா்.

பல்வேறு ரயில் நிலையங்களில் நடை மேம்பாலம், லிஃப்ட், எஸ்கலேட்டா்கள், கழிப்பறை வசதிகள், மாற்றுத்திறனாளிகளுக்கு ஏற்ற சாய்வு நாற்காலிகள் போன்ற வசதிகள் உள்ளதையும், பயணிகளுக்கு ஏற்ற கருவியான யுடிஎஸ் மொபைல் செயலி குறித்தும் விவாதிக்கப்பட்டது.

தொடா்ந்து, கோட்ட மேலாளா் பன்னாலால் பேசுகையில், பயணிகளின் தேவைகளைப் பூா்த்தி செய்வதில் சேலம் கோட்டம் சிறப்பாக செயல்படுகிறது. அதே நேரத்தில், உறுப்பினா்களின் கோரிக்கைகள், பரிந்துரைகள் குறித்து அதிகாரிகள் பரிசீலிப்பாா்கள் என உறுப்பினா்களுக்கு உறுதியளித்தாா்.