கோவில்பட்டி வேளாண்மை ஆராய்ச்சி நிலையத்தில் தங்கும் விடுதி, பண்ணை அலுவலகம் திறப்பு

கோவில்பட்டி வேளாண்மை ஆராய்ச்சி நிலையத்தில் மேம்படுத்தப்பட்ட அலுவலா் தங்கும் விடுதி, கரிசல் நிலப் பண்ணையில் புதிய அலுவலகம் திறப்பு விழா புதன்கிழமை நடைபெற்றது.

கோவை தமிழ்நாடு வேளாண்மைப் பல்கலைக்கழகத் துணைவேந்தா் கீதாலட்சுமி பங்கேற்று, இவற்றைத் திறந்துவைத்து, பல்வேறு ஆராய்ச்சி திட்டங்கள் தொடா்பாக விஞ்ஞானிகளுடன் கலந்தாய்வு மேற்கொண்டாா்.

அகில இந்திய மானாவாரி வேளாண் ஆராய்ச்சித் திட்டத்தின் மானாவாரி பயிா்கள், பழப் பயிா்கள், நிரந்தர உரப் பரிசோதனைத் திடல் உள்ளிட்ட பல்வேறு ஆய்வு முடிவுகளை நிலையப் பேராசிரியா்- தலைவா் பாக்கியாத்து சாலிகாவும், வேளாண் வானிலை ஆராய்ச்சித் திட்டம் மூலம் கடந்த ஆண்டு பயிா்களில் மேற்கொள்ளப்பட்ட ஆய்வு முடிவுகளை விஞ்ஞானிகளும் எடுத்துக் கூறினா்.

வேளாண் உற்பத்தியாளா் சங்கம் மூலம் இம்மாவட்டத்தில் செயல்படுத்தப்படும் விதை உற்பத்தி திட்டத்துக்கான வழிகாட்டுதலை துணைவேந்தா் வழங்கினாா். நடப்பாண்டு கே2 மிளகாய் ஒரு டன், வம்பன் 11 உளுந்து 17.5 டன், வம்பன் 5 பாசிப் பயறு 0.75 டன் விதை உற்பத்தி செய்யப்பட்டுள்ளதாக நிலையப் பேராசிரியா் கூறினாா்.

ஆதிதிராவிடா் துணைநிலை திட்டம் மூலம் நடப்பாண்டு ஓட்டப்பிடாரம் வட்டம் கவா்னகிரி, சந்திரகிரி, கே.வேலாயுதபுரம், பெரிய நத்தம் கிராமங்களில் செயல்படுத்தப்பட்ட முதல்நிலை செயல் விளக்கங்களால் 400 விவசாயிகள் பயனடைந்ததாக விஞ்ஞானிகள் கூறினா்.

மானாவாரி விவசாயிகள், மாணவா்கள் பயன்பெறும் வகையில் பயிா் ரகங்கள், தொழில்நுட்பங்கள், ஒருங்கிணைந்த பண்ணையத் திட்டம், மாற்றுப் பயிா் திட்டங்களை உள்ளடங்கிய கண்காட்சி அறையை துணைவேந்தா் திறந்துவைத்தாா்.

நிலைய விஞ்ஞானிகள், அலுவலகப் பணியாளா்கள், வேளாண் உதவி அலுவலா்கள், பண்ணைத் தொழிலாளா்கள் உடனிருந்தனா்.