கோவை பெண் மீது தாக்குதல்; தமாகா முன்னாள் கவுன்சிலர் மீது வழக்கு; வைரல் வீடியோவின் பின்னணி என்ன?

கோவை உருமாண்டம்பாளையம் அருகே உள்ள சாஸ்திரி நகர் பகுதியைச் சேர்ந்தவர் ரம்யா. இவர் தன் வீட்டிலேயே வடகம் தயாரித்து கடைகளுக்கு வியாபாரம் செய்து வருகிறார்.

அந்தப் பகுதியில் தற்போது பாதாள சாக்கடை அமைக்கும் பணிகள் நடைபெற்று வருகின்றன.

இதனால் சாலைகள் ஆங்காங்கே குண்டும், குழியுமாக உள்ளன.

இந்நிலையில் ரம்யாவை அதே பகுதியைச் சேர்ந்த சுந்தர்ராஜன் என்பவர் கடுமையாகth தாக்கியுள்ளார். இந்த வீடியோ சமூக வலைத்தளங்களில் வெளியாகி அதிர்ச்சியை ஏற்படுத்தியுள்ளது.

இது குறித்து காவல்நிலையத்தில் புகாரளித்த ரம்யா செய்தியாளர்களைச் சந்தித்தார்.

அப்போது அவர் கூறுகையில், “எங்கள் சாலை மிகவும் குறுகலாக இருக்கும். பாதாள சாக்கடை பணியும் நடந்து வருகிறது.

இதனால் வாகனங்கள் எதிர் எதிரே செல்ல முடியாத நிலை உள்ளது. எங்கள் வீட்டில் எதிரில் உள்ள கல்லூரி மாணவர் பைக்கில் வந்தார்.

அப்போது சிலிண்டர் விநியோகம் செய்வதற்காக வாகனம் நிறுத்தப்பட்டிருந்தது. சிலிண்டர்காரர் விநியோகத்துக்குச் சென்றுவிட்டார்.

அதனால் அந்த மாணவன் என்னைத் தொடர்பு கொண்டு உதவி கேட்டார். அந்த வழியில் ரிவர்ஸ் செல்வதும் கடினம்.

எனவே, அருகில் செங்காளியப்பன் என்பவரின் வீட்டின் முன்பிருந்த ஸ்லோப் மீது ஏறி வந்தால் சிலிண்டர் வாகனமும் சென்றுவிடும், நீங்களும் வந்துவிடலாம் என்று கூறினேன்.

அவரின் வீட்டுக்கு எந்த பாதிப்பும் ஏற்பட போவதில்லை. பொதுவாகவே செங்காளியப்பன் பெண்களிடம் மரியாதை குறைவாகத்தான் பேசுவார்.

‘எதற்காக என் வீட்டின் முன்பு நிறுத்த சொல்கிறாய்’ என்று வாக்குவாதம் செய்தார். அதனால் அந்த மாணவன் ரிவர்ஸ் எடுத்து சென்றுவிட்டார்.

மறுபக்கம் சிலிண்டர் வாகனம் சேற்றுக்குள் சிக்கிவிட்டது. அந்த வாகனம் அங்கிருந்து சென்றால்தான் மற்ற வாகனங்கள் வர முடியும்.

அதன் காரணமாக நாங்கள் வாகனத்தில் சிலிண்டர்களை இறக்கும் பணிகளில் ஈடுபட்டிருந்தோம்.

அப்போது செங்காளியப்பன் மகன் ராஜேஷ் இரும்பு ராடு மற்றும் அரிவாளை எடுத்து என்னை அடிக்க வந்தார். எனக்குப் பயம் வந்துவிட்டது.

பாதுகாப்புக்காக நான் வீடியோ எடுத்தபோது  ராஜேஷின் நண்பர் சுந்தர்ராஜன் திடீரென வந்து என் கையைப் பிடித்து இழுத்து, தள்ளிவிட்டு உதைத்து கடுமையாகத் தாக்கினார்.

கொஞ்சம் விட்டிருந்தாலும் என்னைக் கொலை செய்திருப்பார்கள். எங்கள் பகுதியில் பெண்களுக்குப் பாதுகாப்பு இல்லை.” என்று கூறினார்.

இதில் சுந்தர்ராஜன் த.மா.கா முன்னாள் கவுன்சிலர் என்பது குறிப்பிடத்தக்கது.

ரம்யா அளித்த புகாரின் அடிப்படையில் அனைத்து மகளிர் காவல்நிலையத்தில் சுந்தர்ராஜன் உள்ளிட்ட 3 பேர் மீது வழக்குப்பதிவு செய்து விசாரித்து வருகிறார்கள். இந்த சம்பவம் கோவையில் பரபரப்பை ஏற்படுத்தியுள்ளது.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்... https://bit.ly/3PaAEiY

வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்... https://bit.ly/3PaAEiY