`எம்புரான்' பட தயாரிப்பாளரிடம் ரூ.1.5 கோடி பறிமுதல்; அமலாக்கத்துறை அதிரடி நடவடிக்கை

பிரித்விராஜ் இயக்கத்தில் மோகன்லால் நடிப்பில் கடந்த 2019-ம் ஆண்டு வெளியான திரைப்படம் `லூசிஃபர்'. இப்படத்தின் இரண்டாம் பாகமாக உருவாகியிருக்கும் `எல் 2: எம்புரான்' கடந்த 27-ம் தேதி திரையரங்குகளில் வெளியானது. இந்தப் படத்தை கோகுலம் மூவிஸ், லைகா புரொடக்சன்ஸ் ஆகிய நிறுவனங்கள் இணைந்து தயாரித்துள்ளன.

சமீபத்தில் வெளியான இந்தத் திரைப்படம் பல்வேறு சர்ச்சைகளில் சிக்கியிருக்கிறது. குஜராத் மதக்கலவரத்தைப் போலக் காட்சி ஒன்று இடம்பெற்றிருந்தாக, வலதுசாரிகள் எம்புரானைக் கடுமையாக விமர்சித்து வந்தனர்.

தவிர இதில் ஹிந்து மதத்தினரைப் புண்படுத்தும் விதமாக சில காட்சிகள் இடம் பெற்றுள்ளது. அதனை நீக்க வேண்டும் என்று ஆர்எஸ்எஸ் அமைப்பைச் சேர்ந்த பலர் எதிர்ப்பு தெரிவித்து வந்தனர். அதேபோல, முல்லைப்பெரியாறு அணை குறித்து சர்ச்சைக்குரிய காட்சிகள் இடம்பெற்றுள்ளதாகத் தமிழகத்திலும் எதிர்ப்புகள் கிளம்பி வருகின்றன.

இந்நிலையில்,நேற்று ( ஏப்ரல் 4) கோகுலம் குழும நிறுவனங்களில் ஒன்றான கோகுலம் சிட்பண்ட்ஸ் நிதி நிறுவனத்தில் அமலாக்கத்துறை அதிகாரிகள் சோதனையில் ஈடுபட்டனர். கோகுலம் கோபாலன் வீடு உள்பட கோகுலம் சிட்பண்ட்ஸ் தொடர்பான 5 இடங்களில் அதிகாரிகள் சோதனை நடத்தினர்.

கோகுலம் குழுமத்தின் ஒரு நிறுவனமான கோகுலம் மூவிஸ் தயாரித்த 'எம்புரான்' திரைப்படம் சர்ச்சையை ஏற்படுத்தியுள்ள நிலையில், அந்நிறுவனம் தொடர்பான இடங்களில் ரெய்டு நடத்தப்பட்டு வருவது பரபரப்பை ஏற்படுத்தி இருந்தது.

இந்த சோதனையில் முக்கிய ஆவணங்கள் கைப்பற்றப்பட்டதாகத் தகவல் வெளியான நிலையில் தற்போது ஒன்றரை கோடி ரூபாய் பறிமுதல் செய்யப்பட்டுள்ளதாக அமலாக்கத்துறைத் தெரிவித்திருக்கிறது.

Vikatan WhatsApp Channel

இணைந்திருங்கள் விகடனோடு வாட்ஸ்அப்பிலும்... CLICK BELOW LINK

https://bit.ly/VikatanWAChannel