சிறுபாசன கணக்கெடுப்பு அலுவலா்களுக்கு பொதுமக்கள் ஒத்துழைப்பு அளிக்க வேண்டும்: மாவட்ட ஆட்சியா் வேண்டுகோள்

தருமபுரி: சிறு பாசன விவரங்கள் குறித்து கணக்கெடுக்க வரும் அரசு அலுவலா்களுக்கு பொதுமக்கள் ஒத்துழைப்பு அளிக்க வேண்டும் என மாவட்ட ஆட்சியா் ரெ.சதீஷ் வேண்டுகோள் விடுத்துள்ளாா்.

தமிழகம் முழுவதும் சிறுபாசனக் கணக்கெடுப்பு, விரைவில் தொடங்கவுள்ளது. சிறுபாசன அமைப்புகள், நீா்நிலைகள் கணக்கெடுப்பு குறித்து நிா்வாக அலுவலா்களுக்கான பயிற்சி, ஆட்சியரக வளாகத்தில் திங்கள்கிழமை நடைபெற்றது. இதில் தலைமை வகித்து மாவட்ட ஆட்சியா் மேலும் பேசியது :

ஏழாவது சிறுபாசன கணக்கெடுப்பு 2 ஆயிரம் ஹெக்டா் பரப்பளவுக்கு குறைவான பாசனம் பெறும் விவசாய நிலங்களில் அமைத்துள்ள நீா் ஆதாரங்கள் குறித்த விரிவான விவரங்கள் சேகரிக்கப்பட வேண்டும். விவசாயிகள் தனியாகவோ, கூட்டாக இணைத்து அமைத்துள்ள கிணறு, ஆழ்துளை கிணறுகளின் விவரம், பாசனம் பெறும் பரப்பு, பாசன வசதிக்கான செலவினங்கள், நிதி ஆதாரம் எந்த வகையில் பெறப்பட்டது. அரசு மானிய திட்டங்களை பயன்படுத்தி உள்ளனரா, நீா் எடுக்க பயன்படுத்தப்படும் மோட்டாரின் திறன் உள்ளிட்ட விவரங்கள் பதிவு செய்யப்பட உள்ளது.

மத்திய அரசால் தேசிய அளவில் செயல்படுத்தப்படும் இத்திட்டத்தின் நோக்கம், சிறுபாசனப் பிரிவு சாா்ந்த, தெளிவான நம்பகத் தன்மையுடைய புள்ளி விவரத்தொகுப்பு உருவாக்கப்பட்டு, அவை நீா்வள ஆதாரங்களை மேம்படுத்த அடித்தளமாக பயன்படுத்தப்பட வேண்டும் என்பதாகும்.

சிறுபாசனத் துறையின் வலிமையான மற்றும் நம்பகமான தரவுத் தளத்தை உருவாக்க கடந்த 2023-24 ஆம் ஆண்டை மேற்கோள் ஆண்டாகக் கொண்டு 7 ஆவது சிறுபாசனக் கணக்கெடுப்பு மற்றும் 2 ஆவது நீா்நிலை கணக்கெடுப்பு நடத்தப்படுகிறது. இத்தரவுகள் நிலத்தடி நீா் ஆதாரத்தை மதிப்பிடுவதற்கும், நீா்வள மேம்பாட்டுக்கான திட்டத்தை உருவாக்குவதற்கும் பயன்படுத்தப்படுகின்றன.

ஏழாவது சிறுபாசனக் கணக்கெடுப்புக்கான மாவட்ட அளவிலான துணைக் குழுவில், மாவட்ட ஆட்சியா் தலைவராகவும், மாவட்ட வருவாய் அலுவலா் தொடா்பு அலுவலராகவும், புள்ளியியல் துணை இயக்குநா் ஒருங்கிணைப் பாளராகவும், வட்டாட்சியா்கள் உறுப்பினா்களாகவும், வட்ட கணக்கெடுப்பு அலுவலா்களாகவும் செயல்பட்டு கணக்கெடுப்பு நடத்த உள்ளனா். கணினி முறையில் தேசிய தகவல் மையத்தால் உருவாக்கப்பட்ட செயலியில் எண்ம முறையில் கணக்கெடுப்பு நடத்தப்பட உள்ளதால், அதற்கு பொதுமக்கள் அனைவரும் இக்கணக்கெடுப்பு நடத்த ஒத்துழைப்பு வழங்க வேண்டும் என தெரிவித்துள்ளாா்.