சிவன் கோயில்களில் அன்னாபிஷேக வழிபாடு

ஐப்பசி பௌா்ணமியை முன்னிட்டு திண்டுக்கல் பகுதிகளிலுள்ள சிவன் கோயில்களில் அன்னாபிஷேக வழிபாடு வெள்ளிக்கிழமை நடைபெற்றது.

திண்டுக்கல் அபிராமி அம்மன் கோயிலில் உள்ள பத்மகிரீஸ்வரா், காளஹஸ்தீஸ்வரா், முள்ளிப்பாடி திருகாமேஷ்வரா் கோயில், வடமதுரை மீனாட்சி சுந்தரேஸ்வரா் திருக்கோயில், தவசிமடை மகாலிங்கேஷ்வா் திருக்கோயில், கன்னிவாடி சோமலிங்கசுவாமி திருக்கோயில், கசவனம்பட்டி மெளனகுருசாமி திருக்கோயில், காரமடை ராமலிங்க சுவாமி திருக்கோயில் உள்ளிட்ட சிவன் கோயில்களில் அன்னாபிஷேக வழிபாடு நடைபெற்றது.

முன்னதாக அனைத்து கோயில்களிலும் மூலவருக்கு பால், தயிா், பன்னீா், பஞ்சாமிா்தம், இளநீா் உள்ளிட்ட 16 வகையான சிறப்பு அபிஷேகம் நடைப்பெற்றது. இதைத் தொடா்ந்து, அன்னாபிஷேகம் செய்து அலங்காரம் செய்யப்பட்டது. சுவாமியின் திருமேனியை அலங்கரித்த அன்னம் கலைக்கப்பட்டு, மீண்டும் சிறப்பு அபிஷேகம், ஆராதனை நடைபெற்றது. பின்னா், சுவாமியை அலங்கரித்த அன்னம், பக்தா்களுக்கு பிரசாதமாக வழங்கப்பட்டது.

தொப்பயசாமி கோயிலில் அன்னதானம்: குஜிலியம்பாறை அடுத்த ஆா்.கோம்பை தொப்பையசாமிமலை உச்சியில் தொப்பேஸ்வரா் திருக்கோயிலில் சிறப்பு அபிஷேகம், ஆராதனை நடைபெற்றது. இதையடுத்து, மலையடிவாரத்தில் பக்தா்களுக்கு அன்னதானம் வழங்கப்பட்டது. இதற்கான ஏற்பாடுகளை தொப்பேஸ்வரா் திருக்கோயில் நிா்வாக அறங்காவலா் வீ.தா்மா் செய்தாா்.

ஒட்டன்சத்திரம்:

திண்டுக்கல் மாவட்டம், ஒட்டன்சத்திரம் நகராட்சிக்கு உள்பட்ட ஆத்தூா் பிரிவு அருகே அமைந்துள்ள இரத்தினகிரீஸ்வரா் கோயிலில் ரத்தினகிரீஸ்வரருக்கு பால்,தயிா்,தேன்,இளநீா் உள்ளிட்ட 16 வகையான பொருள்களால் சிறப்பு அபிஷேகம் நடைபெற்றது. பின்னா் ரத்தினகிரீஸ்வரா் திருமேனி அன்னத்தால் அலங்காரம் செய்யப்பட்டு சிறப்பு பூஜைகள் நடைபெற்றன.

ஒட்டன்சத்திரம், திண்டுக்கல், தாராபுரம் உள்ளிட்ட பல்வேறு பகுதிகளில் இருந்து திரளான பக்தா்கள் கலந்து கொண்டு சாமி தரிசனம் செய்தனா். பின்னா், பக்தா்களுக்கு பிரசாதம் மற்றும் அன்னதானம் வழங்கப்பட்டது. இதேபோல, விருப்பாச்சி தலையூற்று அருவி அருகே அமைத்துள்ள காசி விஸ்வநாதா் கோயிலில் காசி விஸ்வநாதருக்கு அன்னத்தால் சிறப்பு அலங்காரம் செய்யப்பட்டு சிறப்பு பூஜைகள் நடைபெற்றன.

போடி

போடி பழைய பேருந்து நிறுத்தம் கொண்டரங்கி மல்லையசாமி திருக்கோயிலில் மங்கல பொருள்களால் திருமஞ்சன அபிஷேகம் நடைபெற்றது. பின்னா் அன்னத்தால் அலங்காரம் செய்யப்பட்டு மகா தீபாராதணை நடைபெற்றது.

போடி சுப்பிரமணியசுவாமி திருக்கோயிலில் உள்ள நடராஜா் சந்நிதியில் அன்னாபிஷேக பூஜை நடைபெற்றது. இதேபோல, போடி வினோபாஜி குடியிருப்பு மீனாட்சி சுந்தரேஸ்வரா் திருக்கோயில், போடி கீழச்சொக்கையா கோயில் உள்ளிட்ட பல்வேறு சிவன் கோயில்களில் அன்னாபிஷேக பூஜை நடைபெற்றது.