சேலத்தில் ஜவுளி பூங்காவுக்கான பணிகள் விரைவில் துவக்கம்: அமைச்சா் டி.ஆா்.பி.ராஜா ஆய்வு

சேலம்: சேலம் மாவட்டத்தில் 120 ஏக்கர் பரப்பளவில் அதி நவீன ஜவுளி பூங்காவுக்கான பணிகள் விரைவில் துவங்கப்படும் என தொழில்துறை அமைச்சா் டி.ஆா்.பி.ராஜா கூறினாா்.

சேலம் மாவட்டம் ஜாகீா் அம்மாபாளையம் பகுதியில் 120 ஏக்கர் பரப்பளவில் சிப்காட் ஒருங்கிணைந்த நவீன ஜவுளி பூங்கா அமைப்பதற்கான பணிகள் நடைபெற்று வருகிறது.

இந்த நிலையில், ஜவுளி பூங்கா அமையுள்ள இடத்தை ஞாயிற்றுக்கிழமை தமிழக தொழில்துறை அமைச்சர் டி.ஆா்.பி. ராஜா அதிகாரிகளுடன் நேரில் நெல் சென்று பார்வையிட்டு ஆய்வு செய்தார்.

பின்னா் அவா் செய்தியாளா்களிடம் கூறியதாவது:

தமிழகத்தில் அனைத்து பகுதிகளுக்கும் தொழில் வளர்ச்சி கிடைக்கவும் இளைஞர்கள் மற்றும் பெண்கள் என அனைத்து தரப்பினருக்கான வேலைவாய்ப்பினை உறுதி செய்திடும் வகையில் பல்வேறு திட்டங்களை தமிழக முதல்வர் ஸ்டாலின் செயல்படுத்தி வருகிறார்.

சேலம் மாவட்டத்தில் கடந்த 2021 டிசம்பர் 11 ஆம் தேதி நடைபெற்ற அரசு நலத்திட்ட உதவிகள் வழங்கும் விழாவில் சேலம் மாவட்டத்தில் தொழில் வளா்ச்சியை மேம்படுத்துவதற்காகவும், அதிக வேலைவாய்ப்புகளை உருவாக்குவதற்காகவும் ஒருங்கிணைந்த ஜவுளி பூங்கா அமைக்கப்படும் எனவும், வெள்ளிக்கொலுசு உற்பத்தியாளா்கள் தொழில் தொடங்குவதற்கு வசதியாக புதிய பன்நோக்கு உற்பத்தி மையம் அமைக்கப்படும் எனவும், இளைஞா்களுக்கு அதிக வேலைவாய்ப்புகள் அளிக்கும் வகையில் கருப்பூரில் டைடல் மென்பொருள் தொழில் பூங்கா அமைக்கப்படும் எனவும் முதல்வா் மு.க.ஸ்டாலின் அறிவித்தாா்.

அதன்படி, சேலம் சிப்காட் ஒருங்கிணைந்த ஜவுளிப் பூங்கா அமைப்பதற்கு ஜாகீா் அம்மாபாளையத்தில் 120 ஏக்கா் பரப்பளவில் தோ்வு செய்யப்பட்டுள்ள இடத்தில் ஆய்வு மேற்கொள்ளப்பட்டது.

இதையும் படிக்க |அமித்ஷா பதவி விலக வேண்டும்: செ.கு.தமிழரசன்

இந்த ஜவுளிப் பூங்காவில் நூல் பதனிடுதல், கஞ்சி தோய்த்தல், நெசவு, ஜவுளி உற்பத்தி, துணி பதனிடுதல், ஆயத்த ஆடை உற்பத்தி போன்ற தொழிலில் ஈடுபட்டு வருபவா்கள் பயனடைவா். இந்த ஒருங்கிணைந்த ஜவுளி பூங்கா அமைப்பதன் மூலம் சேலம் மண்டலத்தில் சுமாா் 10,000 நபா்கள் நேரடியாகவும், 30,000 முதல் 40,000 நபா்கள் வரை மறைமுகமாகவும் பயனடைய வாய்ப்பாக அமையும். இந்த ஒருங்கிணைந்த ஜவுளிப் பூங்கா பணிகள் விரைவில் தொடங்க நடவடிக்கை மேற்கொள்ளப்பட்டுள்ளதாக தெரிவித்தாா்.

முன்னதாக, தொழிற்துறை வளா்ச்சிக்கேற்ப சேலம் விமான நிலைய விரிவாக்கம் தொடா்பாக விமான நிலைய அலுவலா்கள், வருவாய்த் துறை அலுவலா்களிடம் அமைச்சா் கேட்டறிந்தாா்.

அதேபோன்று ஓமலூா் வட்டம், ஆணைகவுண்டன்பட்டி, கருப்பூா் பகுதிகளை உள்ளடக்கிய நிலப்பரப்பளவில் ரூ. 29.50 கோடி மதிப்பீட்டில், அமைக்கப்பட்டு பயன்பாட்டில் உள்ள மினி டைடல் பூங்காவை அமைச்சா் டி.ஆா்.பி. ராஜா நேரில் பாா்வையிட்டு ஆய்வு செய்தாா்.

இந்த ஆய்வின்போது, சிப்காட் மேலாண்மை இயக்குநா் செந்தில்ராஜா, மாவட்ட ஆட்சியா் ரா.பிருந்தா தேவி, சேலம் மேற்கு தொகுதி சட்டப்பேரவை உறுப்பினா் இரா.அருள், விமான நிலைய இயக்குநா் வைதேகிநாதன், விமான நிலைய உதவி இயக்குநா் ரமேஸ் உள்ளிட்ட தொடா்புடைய அலுவலா்கள் உடனிருந்தனா்.