சேலத்தில் புத்தகத் திருவிழா: அமைச்சா் ராஜேந்திரன் தொடங்கிவைத்தாா்

சேலம் புதிய பேருந்து நிலையம் அருகே உள்ள மாநகராட்சித் திடலில் நடைபெறும் புத்தகத் திருவிழாவை சுற்றுலாத் துறை அமைச்சா் ராஜேந்திரன் வெள்ளிக்கிழமை தொடங்கிவைத்தாா்.

டிசம்பா் 9 ஆம் தேதி வரை காலை 10 மணி முதல் இரவு 9 மணி வரை நடைபெறும் புத்தகத் திருவிழாவில் அமைக்கப்பட்டுள்ள அரங்குகளை அமைச்சா் பாா்வையிட்டாா். இக் கண்காட்சியில் தென்னிந்திய புத்தக விற்பனையாளா்கள் மற்றும் பதிப்பாளா்கள் சங்கம், புத்தக வெளியீட்டாா்கள் கலந்துகொள்ளும் வகையில் 200-க்கும் மேற்பட்ட அரங்குகள் அமைக்கப்பட்டுள்ளன.

சேலம் புத்தகத் திருவிழாவில் நாள்தோறும் கருத்தரங்குகள், பயிலரங்குகள், கலை நிகழ்ச்சிகள் நடைபெறுகின்றன. முதல் நாளான வெள்ளிக்கிழமை தன்னம்பிக்கை ஊக்கப் பேச்சாளா் மதுரை ராமகிருஷ்ணன் சிறப்புரை ஆற்றினாா். 30 ஆம் தேதி நாஞ்சில் நாடன் ‘பசியும் சுவையும்’ என்ற தலைப்பிலும், டிசம்பா் 1 ஆம் தேதி பவா செல்லதுரை ‘என் அன்பான புத்தகமே’ என்ற தலைப்பிலும், டிசம்பா் 2 ஆம் தேதி யுவன் சந்திரசேகா் ‘மாற்று எழுத்து’ என்ற தலைப்பிலும் கருத்துரை வழங்குகின்றனா். முதியோா், மாற்றுத் திறனாளிகள் கண்காட்சியில் பங்கேற்கும் வகையில் சிறப்பு ஏற்பாடுகள் செய்யப்பட்டுள்ளன.

விழாவில் மாவட்ட ஆட்சியா் ரா.பிருந்தாதேவி, மேயா் ஆ.ராமச்சந்திரன், சட்டப் பேரவை உறுப்பினா் இரா.அருள், உள்ளாட்சி அமைப்பு பிரதிநிதிகள் கலந்து கொண்டனா்.