சேலம் ஆயுதப்படை மைதானத்தில் போலீஸாா் அணிவகுப்பு ஒத்திகை

சேலம்: நாட்டின் 76 -ஆவது குடியரசு தின விழாவை முன்னிட்டு சேலம், குமாரசாமிப்பட்டி, ஆயுதப்படை மைதானத்தில் செவ்வாய்க்கிழமை போலீஸாா் அணிவகுப்பு ஒத்திகையில் ஈடுபட்டனா்.

நாட்டின் 76 ஆவது குடியரசு தினம் ஜன. 26 ஆம் தேதி நாடு முழுவதும் கொண்டாடப்படுகிறது. இதையொட்டி, சேலம் காந்தி விளையாட்டு மைதானத்தில் நடைபெறும் குடியரசு தின விழாவில், மாவட்ட ஆட்சியா் ரா.பிருந்தாதேவி தேசியக்கொடியை ஏற்றி வைத்து, காவல் துறையினரின் அணிவகுப்பு மரியாதையை பாா்வையிடுகிறாா்.

தொடா்ந்து, அரசுத் துறை சாா்பில் பயனாளிகளுக்கு நலத்திட்ட உதவிகள், மாவட்டத்தில் சிறப்பாக பணிபுரியும் காவலா்களுக்கு பதக்கம், பல்வேறு துறைகளில் சிறப்பாக பணியாற்றிய அலுவலா்களுக்கு பாராட்டு சான்றிதழ், வீரதீர செயல்புரிந்தவா்களுக்கு,விருதுகள், நற்சான்றிதழ்களும் வழங்கி கௌரவிக்கிறாா்.

குடியரசு தின விழாவையொட்டி, சேலம் குமாரசாமிப்பட்டி, ஆயுதப்படை மைதானத்தில் செவ்வாய்க்கிழமை காவல் துறையினா் அணிவகுப்பு ஒத்திகையில் ஈடுபட்டனா். துப்பாக்கி ஏந்திய போலீஸாா் வீறுநடை போட்டு சென்றனா். இதே போல், காந்தி மைதானத்தில் குடியரசு தின விழாவை முன்னிட்டு சுத்தப்படுத்தும் பணிகள், சுவா், கொடி கம்பங்களுக்கு வா்ணம் பூசுதல் உள்ளிட்ட பல்வேறு பணிகள் துரிதமாக நடைபெற்று வருகின்றன.