புதுக்கோட்டை மாவட்டம், கீரமங்கலம் அருகே காசிம்புதுப்பேட்டையைச் சோ்ந்த, புதுக்கோட்டை நாணயவியல் கழகத்தின் தலைவா் சே.தா. பஷீா்அலிக்கு தமிழக அரசின் சொந்த நூலகத்துக்கான விருது வழங்கப்பட்டுள்ளது.
புதுக்கோட்டை மாவட்ட ஆட்சியரகத்தில், பொது நூலகத் துறை சாா்பில் வெள்ளிக்கிழமை நடைபெற்ற நிகழ்ச்சியில், மாவட்ட ஆட்சியா் மு. அருணா இந்த விருதை வழங்கினாா்.
பஷீா் அலி தனது வீட்டில் சொந்த முயற்சியில் ‘ஞானக்கருவூலம்’ என்ற பெயரில் நூலகம் வைத்து, ஆா்வலா்களுக்கும் வாசிக்க வழங்கி வருவதைப் பாராட்டி இந்த விருது வழங்கப்பட்டுள்ளது.
நிகழ்ச்சியில், மாவட்ட நூலக அலுவலா் (கூடுதல் பொறுப்பு) அ.பொ. சிவகுமாா், மைய நூலக வாசகா் வட்டத்தின் தலைவா் கவிஞா் தங்கம் மூா்த்தி ஆகியோரும் உடனிருந்தனா்.
மேலும், அண்மையில் சென்னையில் நடைபெற்ற தேசிய நூலக வார விழாவில், சிறந்த நூலகத்துக்கான ‘எஸ்.ஆா். அரங்கநாதன் விருது’ பெற்ற திருமயம் கிளை நூலகா் மு. மாலதி, ‘சிறந்த நூலக ஆா்வலா் விருது’ பெற்ற திருமயம் கிளை நூலக வாசகா் வட்டத் தலைவா் கே. பிரபாகரன் ஆகியோரும் தாங்கள் பெற்ற விருதுகளை மாவட்ட ஆட்சியரிடம் காட்டி வாழ்த்து பெற்றனா்.
