தஞ்சை: 916 முத்திரை, போலி நகை - அடகு வைத்து மோசடி செய்த 2 பெண்கள் உட்பட மூன்று பேர் கைது!

தஞ்சாவூர் அருகே உள்ள ரெட்டிபாளையம் பகுதியில், தனியார் நிதி நிறுவனம் செயல்பட்டு வருகிறது. இங்கு ரெட்டிபாளையம் சாலையில் உள்ள காந்திரபும் பகுதியை சேர்ந்த திவ்யா(31), செக்கடி பகுதியை சேர்ந்த சரஸ்வதி(38) ஆகிய இருவரும் தங்க வளையல் மற்றும் கை செயின் ஆகியவற்றை அடமானம் வைக்க சென்றுள்ளனர். ஏற்கெனவே இருவரும் அதே நிதி நிறுவனத்தில் அதே போன்று வளையல், கைசெயின் அடகு வைத்திருந்ததாக சொல்லப்படுகிறது.

ஏற்கெனவே வைத்த அதே நகை போல் தற்போது கொடுத்ததால் நிதி நிறுவனத்தினர் சந்தேகம் அடைந்துள்ளனர். இதையடுத்து அதன் நிர்வாக அலுவலர் கஜேந்திரன், கள்ளப்பெரம்பூர் போலீஸாருக்கு தகவல் கொடுத்துள்ளார். நகையை எடைப்போட்டு விட்டு, பணம் தருவதாக கூறி போலீஸ் வருவதற்காக நேரம் கடத்திய நிதி நிறுவனத்தினர், திவ்யா, சரஸ்வதியை காத்திருக்க செய்துள்ளனர். இதற்கிடையே, ஏற்கெனவே அடகு வைத்த நகையையும், தற்போது அடகு வைக்க கொடுத்த நகையையும் நகை மதிப்பீட்டாளர் சோதனை செய்தததில் அந்த நகைகள் போலி என்று தெரியவந்துள்ளது.

அத்துடன், வெள்ளி பொருள்களுக்கு தங்க முலாம் பூசி, ஒரிஜினல் நகை போல் நம்புவதற்காக ஹால்மார்க் முத்திரை பதித்திருப்பதை கண்டுபிடித்தனர். இதையடுத்து அங்கு வந்த போலீஸார் திவ்யா மற்றும் சரஸ்வதியை ஸ்டேஷனுக்கு அழைத்துச் சென்று விசாரணை நடத்தியதில் போலி நகைகளை அடகு வைத்து மோசடி செய்ததை ஒப்புக்கொண்டனர். இது குறித்து போலீஸ் தரப்பில் கூறுகையில், ``தஞ்சாவூர் கீழவாசல், கொள்ளுப்பேட்டை தெருவைச் சேர்ந்த மணிவண்ணன்(37) வெள்ளிப்பொருள்களுக்கு தங்க முலாம் பூசி, போலி நகையாக மாற்றி மோசடியில் ஈடுபட்டுள்ளார். அந்த போலி நகையை திவ்யா, சரஸ்வதி, சீனிவாசபுரம் பகுதியைச் சேர்ந்த கவிதா ஆகிய மூன்று பேரிடம் கொடுத்து அடகு வைக்க சொல்லி பணம் பெற்றுள்ளார்.

இதற்காக மூன்று பேருக்கும் பங்கு கொடுத்துள்ளார். கடந்த ஆண்டு முதல் பல முறை போலி நகைகளை அடகு வைத்து ரூ. 16.31 லட்சம் மோசடி செய்திருப்பது தெரியவந்துள்ளது. இதையடுத்து தலைமறைவாக இருந்த மணிவண்ணனை கைது செய்திருக்கிறோம். மேலும் தலைமறைவாக உள்ள கவிதாவை தேடி வருகிறோம். கைது செய்யப்பட்டுள்ள மூவரிடமும் இது போல் வேறு எங்கெல்லாம் மோசடி செய்துள்ளனர் என்பது குறித்து விசாரணை நடத்தி வருகிறோம்" என்றனர்.