தனியார் உடை மாற்றும் அறையில் ரகசிய கேமரா; அலறிய இளம் பெண் - அக்னி தீர்த்தக் கரையில் அதிர்ச்சி

ராமேஸ்வரம் கோயிலில் தீர்த்தமாடி சாமி தரிசனம் செய்ய நாடு முழுவதும் இருந்து ஆயிரக்கணக்கான யாத்திரைவாசிகள் நாள்தோறும் வருகின்றனர். இங்குள்ள அக்னி தீர்த்த கடலில் நீராடிய பின்னர் கோயிலுக்குள் உள்ள 22 தீர்த்தங்களிலும் நீராடி பின்னர் சாமி தரிசனம் செய்வது வழக்கம். இதே போல் யாத்திரைவாசிகளில் சிலரும், சுற்றுலா பயணிகளும் கடலில் மட்டும் நீராடுவர். இவ்வாறு கடலில் குளித்து முடித்த பின் பெண்கள் உடை மாற்றுவதற்கு என தனியார் உடைமாற்றும் அறைகள் சில உள்ளன.

இந்நிலையில் புதுக்கோட்டை மாவட்டம் திருமயம் பகுதியை சேர்ந்த ஒரு குடும்பத்தினர் நேற்று ராமேஸ்வரம் வந்தனர். இவர்கள் அக்னி தீர்த்த கடலில் நீராடிவிட்டு அதன் எதிரில் உள்ள தனியாருக்கு சொந்தமான டீ கடையுடன் கூடிய உடை மாற்றும் அறைக்கு ஈர துணியினை மாற்ற சென்றுள்ளனர். அப்போது அங்கிருந்த டீ மாஸ்டர், வயதானவர்களை ஒரு அறைக்கும், இளம் பெண்களை ஒரு அறைக்கும் சென்று உடை மாற்ற கூறியதாக கூறப்படுகிறது.

இதையடுத்து ஒருவித தயக்கத்துடன் உடை மாற்றும் அறைக்கு சென்ற இளம் பெண் ஒருவர், உடை மாற்றும் அறை பாதுகாப்பானதா என பார்த்துள்ளார். அப்போது சுவற்றின் இடையே கேமரா பொருத்தியிருப்பதை கண்டு அதிர்ச்சியடைந்து அலறினார். உடனடியாக அந்த கேமராவினை எடுத்து வந்து தனது தந்தையிடம் கொடுத்துள்ளார். அவர் தன்னுடன் வந்தவர்களுடன் சேர்ந்து டீ கடை உரிமையாளர் ராஜேஷ் கண்ணன் மற்றும் டீ மாஸ்டர் மீரான் மைதினை அடித்து வெளுத்தனர். பின்னர் இது குறித்து போலீஸாருக்கு தகவல் கொடுத்தனர்.

அங்கு வந்த போலீஸார் பெண்கள் உடை மாற்றும் அறையில் ரகசிய கேமரா பொருத்தியிருந்த ராஜேஷ் கண்ணனையும், டீ மாஸ்டர் மீரான் மைதீனையும் கைது செய்து நீதிமன்றத்தில் ஆஜர்படுத்தி சிறைக்கு அனுப்பினர்.

இந்நிலையில், உடை மாற்றும் அறையில் உள்ள கருப்பு டைல்ஸுக்கு மத்தியில் வைக்க கருப்பு கலரிலான கேமராவை ஆன் லைன் மூலம் வாங்கியதாகவும், இதில் பதிவான காட்சிகளை மெமரி கார்டுகளில் பதிவேற்றம் செய்வதுடன் அடிக்கடி மெமரி கார்டுகளை மாற்றியும் படம் பிடித்ததாக போலீஸார் விசாரணையின் போது தெரியவந்தது.

இதனால் பெண்கள் உடை மாற்றும் காட்சிகள் பதிவான மெமரி கார்டுகள் குறித்தும், அக்காட்சிகள் வெளிநபர்களுக்கு பகிரப்பட்டதா என்பது குறித்தும் போலீஸார் விசாரணை மேற்கொண்டுள்ளனர். புனித தலத்திற்கு வரும் பெண்களுக்கு அச்சம் ஏற்படுத்தும் வகையில் நடந்த இச்சம்பவம் பெரும் அதிர்ச்சியையும், பரபரப்பையும் ஏற்படுத்தியுள்ளது.