தமிழகத்தில் கருத்து சுதந்திரம் இல்லை: வானதி சீனிவாசன்

தமிழகத்தில் கருத்து சுதந்திரம் இல்லை என்று பாஜக மகளிரணி தேசியத் தலைவரும், கோவை தெற்கு சட்டப் பேரவை உறுப்பினருமான வானதி சீனிவாசன் தெரிவித்தாா்.

கோவை வஉசி பூங்கா பகுதியில் சுத்திகரிக்கப்பட்ட குடிநீா் தானியங்கி இயந்திர தொடக்க விழா ஞாயிற்றுக்கிழமை நடைபெற்றது. இதனை மக்கள் பயன்பாட்டுக்கு எம்எல்ஏ வானதி சீனிவாசன் தொடங்கிவைத்தாா்.

பின்னா், அவா் செய்தியாளா்களிடம் கூறியதாவது:

கோவை தெற்கு சட்டப் பேரவை தொகுதி மக்களுக்காக சுத்திகரிக்கப்பட்ட குடிநீா் இயந்திரம் பல்வேறு இடங்களில் நிறுவப்பட்டுள்ளது. இதன்மூலம் 13,000 குடும்பங்கள் பயனடைந்து வருகின்றனா்.

தமிழகத்தில் அரசுக்கு எதிராக கருத்துகளை பதிவிடுவோா் கைது செய்யப்படுவது புதிதல்ல. கருத்து சுதந்திரம் என்பது திமுக ஆட்சிக்கு எதிராக பதிவிடுபவா்களுக்கு கிடையாது.

யாரெல்லாம் எதிராக இருக்கிறாா்களோ அவா்களைக் கைது செய்வதை வழக்கமாக வைத்து இருக்கிறாா்கள். தமிழகத்தில் கருத்து சுதந்திரம் இல்லை.

நடிகை கஸ்தூரி பேசிய பிறகு தனது பேச்சால் யாராவது புண்பட்டிருந்தால் மன்னிப்பு கேட்டுக்கொள்வதாக தெரிவித்துள்ளாா். அதன் பிறகும் தமிழக அரசு அவரைக் கைது செய்துள்ளது. அவா் சட்டப்படியான நடவடிக்கைகளை மேற்கொள்வாா் என்றாா்.