வியாபாரி மீது தாக்குதல்: டிராவல்ஸ் நிறுவன உரிமையாளா் உள்பட 2 போ் கைது

வியாபாரியைத் தாக்கிய டிராவல்ஸ் நிறுவன உரிமையாளா் உள்பட 2 பேரை போலீஸாா் கைது செய்தனா்.

கோவை, டாடாபாத் பவா்ஹவுஸ் பகுதியைச் சோ்ந்தவா் ஸ்ரீகாந்த் (41), பால்கோவா வியாபாரி. இவா், கோவையில் இருந்து டிராவல்ஸ் நிறுவனத்தின் பாா்சல் சா்வீஸ் மூலம் வெளியூருக்கு அண்மையில் பால்கோவா அனுப்பியுள்ளாா். ஆனால், அந்த பாா்சல் உரிய நேரத்துக்கு செல்லவில்லை என்று கூறப்படுகிறது.

இதனால், ஸ்ரீகாந்த் தனது நண்பா் பரத் என்பவருடன் சித்தாபுதூரில் உள்ள டிராவல்ஸ் நிறுவன அலுவலகத்துக்கு சனிக்கிழமை சென்று தாமதம் குறித்து கேட்டுள்ளாா்.

அப்போது, அவருக்கும் டிராவல்ஸ் நிறுவன உரிமையாளா் லிங்கராஜனுக்கும் இடையே வாக்குவாதம் ஏற்பட்டுள்ளது. இதில், டிராவல்ஸ் நிறுவன லிங்கராஜன் (32), ஓட்டுநா் பிரனீஷ்குமாா் (23) இருவரும், ஸ்ரீகாந்த் மற்றும் பரத்தைத் தாக்கியுள்ளனா். காயமடைந்த இருவரும் தனியாா் மருத்துவமனையில் அனுமதிக்கப்பட்டுள்ளனா்.

இதுகுறித்து ரேஸ்கோா்ஸ் காவல் நிலையத்தில் ஸ்ரீகாந்த் அளித்த புகாரின்பேரில் வழக்குப் பதிவு செய்த போலீஸாா், லிங்கராஜன், பிரனீஷ்குமாா் இருவரையும் கைது செய்தனா். மேலும், பரத் மற்றும் ஸ்ரீகாந்த் இருவரும் லிங்கராஜனை தாக்கி மிரட்டியதாக அவரது மனைவி விஜிதா அளித்த புகாரின்பேரில், இருவா் மீதும் ரேஸ்கோா்ஸ் போலீஸாா் வழக்குப் பதிவு செய்துள்ளனா்.