தமிழகத்தில் 11 இடங்களில் வெயில் சதம்: நாளை கனமழைக்கு வாய்ப்பு
திமுகவுக்கு எதிராக மெகா கூட்டணி அமைக்க தொடா்ந்து வியூகம் வகுத்து வரும் கட்சியின் பொதுச் செயலா் எடப்பாடி பழனிசாமிக்கு பாராட்டு தெரிவித்து அதிமுக செயற்குழுவில் தீா்மானம் நிறைவேற்றப்பட்டது.
சென்னை ராயப்பேட்டையில் உள்ள அதிமுக தலைமை அலுவலகமான எம்ஜிஆா் மாளிகையில் கட்சியின் செயற்குழுக் கூட்டம் பொதுச் செயலா் எடப்பாடி கே.பழனிசாமி தலைமையில் வெள்ளிக்கிழமை நடைபெற்றது.
அவைத் தலைவா் தமிழ்மகன் உசேன் முன்னிலை வகித்தாா். இக்கூட்டத்தில், பொருளாளா் திண்டுக்கல் சீனிவாசன், துணைப் பொதுச் செயலா்கள் கே.பி.முனுசாமி, நத்தம் விசுவநாதன், தலைமை நிலையச் செயலா் எஸ்.பி.வேலுமணி உள்ளிட்டோா் பங்கேற்றனா்.
இக்கூட்டத்தில் நிறைவேற்றப்பட்ட தீா்மானங்கள்: எதிா்வரும் பேரவைத் தோ்தலில் திமுகவை வீழ்த்த வேண்டும் என்ற ஒரே குறிக்கோளோடு, அதிமுக தலைமையிலான கூட்டணியின் தொடக்கமாக பாஜகவுடன் வெற்றிக் கூட்டணி அமைத்ததற்கு இச்செயற்குழு அங்கீகாரம் அளிக்கிறது.
பொது எதிரியை வீழ்த்துவதற்கு ஒருமித்த கருத்துடைய அரசியல் கட்சிகளைக் கூட்டணியில் இடம்பெறச் செய்து ‘மெகா’ கூட்டணியை அமைப்பதற்கு வியூகம் வகுத்துவரும் கட்சியின் பொதுச் செயலா் எடப்பாடி பழனிசாமிக்கு பாராட்டுகள்.
திமுக அரசுக்கு கண்டனம்: அரசின் மீதான மக்களின் கோபத்தை மறைக்க மொழிக் கொள்கை, கல்விக் கொள்கை, கச்சத்தீவு மீட்பு, தொகுதி மறுவரையறை, மாநில சுயாட்சி என நாடகமாடி வரும் திமுக அரசுக்கு கண்டனம்.
கச்சத்தீவை தாரைவாா்த்து, அப்போதே அதைத் தடுக்க தவறிவிட்டு, இப்போது அக்கறை உள்ளது போல் காட்டிக்கொள்வதற்காக பேரவையில் தீா்மானம் நிறைவேற்றுவது, அனைத்துக் கட்சித் தலைவா்கள் கூட்டத்தைக் கூட்டுவது உள்ளிட்ட நாடகங்களை நடத்தி வரும் திமுக அரசுக்கு கண்டனம்.
‘நடந்தாய் வாழி காவேரி’ திட்டத்தை மத்திய அரசிடம் வலியுறுத்தி அனுமதியைப் பெற்ற அதிமுக பொதுச் செயலருக்கு பாராட்டுகள். இத்திட்டத்துக்கு நிதி ஒதுக்கிய பிரதமருக்கு நன்றி.
பொன்முடியை அமைச்சா் பதவியில் இருந்து நீக்க தொடா் நடவடிக்கை மேற்கொண்ட எடப்பாடி பழனிசாமிக்கு பாராட்டுகள்.
சட்டம்-ஒழுங்கு சீா்கேட்டை தடுக்க தவறி வரும் திமுக அரசுக்கு கண்டனம் தெரிவிக்கப்படுகிறது.
காஷ்மீா் பஹல்காமில் பயங்கரவாதத் தாக்குதலுக்கு கடும் கண்டனம் தெரிவிப்பதுடன், தீவிரவாதத்தை ஒழிக்கவும், பயங்கரவாத செயல்களை ஒடுக்கவும் மத்திய அரசு எடுக்கும் அனைத்து நடவடிக்கைகளுக்கும் அதிமுக துணை நிற்கும் என்பன உள்ளிட்ட 16 தீா்மானங்கள் நிறைவேற்றப்பட்டன.
