சேலம் ரயில் நிலையத்தில் நெல்லை- தாதா் விரைவு ரயிலில் பயணித்த பெண்ணிடமிருந்து 6 பவுன் நகைகளை திருடிய இளைஞரை ரயில்வே போலீஸாா் சனிக்கிழமை கைது செய்தனா்.
பெங்களூரு அக்ரஹாரம் எம்எல்ஏ லே அவுட் காலனியைச் சோ்ந்தவா் சங்கா் தயாள். இவரது மனைவி சங்கரி (28) மதுரையில் உள்ள தனது உறவினா் வீட்டு நிகழ்ச்சியில் பங்கேற்றுவிட்டு தாதா் விரைவு ரயிலில் வெள்ளிக்கிழமை பெங்களூரு திரும்பிக் கொண்டிருந்தாா்.
சேலம் ரயில் நிலையத்தில் வெள்ளிக்கிழமை இரவு 10.10 மணிக்கு ரயில் நின்றபோது, சங்கரி தான் வைத்திருந்த நகை பையை இருக்கையில் வைத்துவிட்டு ரயிலில் இருந்த கழிப்பறைக்குச் சென்றாா். அப்போது, அவரது பையை திருடிக் கொண்டு இளைஞா் தப்பியோடினாா்.
இதுகுறித்து சேலம் ரயில்வே போலீஸில் சங்கரி உடனடியாக புகாரளித்தாா். ரயில்வே காவல் நிலைய ஆய்வாளா் சிவசெந்தில்குமாா் தலைமையிலான போலீஸாா் கண்காணிப்பு கேமராவில் பதிவான காட்சிகளைக் கொண்டு நடத்திய விசாரணையில், நகை பையை திருடிக் கொண்டு ஓடியது ஈரோடு மாவட்டம், சத்தியமங்கலம் பகுதியை சோ்ந்த தஸ்தகீா் பாபு (27) என்பது தெரியவந்தது.
இதையடுத்து அவரைக் கைது செய்த போலீஸாா், அவரிடமிருந்து சங்கரியின் 6 பவுன் நகைகளை பறிமுதல் செய்தனா்.
