திருப்பரங்குன்றம் மலை விவகாரம் தொடா்பான வழக்கின் விசாரணையை வருகிற 28-ஆம் தேதிக்கு ஒத்திவைத்து சென்னை உயா்நீதிமன்ற மதுரை அமா்வு திங்கள்கிழமை உத்தரவிட்டது.
திருப்பரங்குன்றம் மலையில் ஆடு, கோழிகள் பலியிடவும், அசைவ உணவுகள் பரிமாறவும், நெல்லித்தோப்புப் பகுதியில் தொழுகை நடத்தவும் தடை விதிக்கக் கோரி, சோலைக்கண்ணன், ராமலிங்கம், பரமசிவம் ஆகியோரும், திருப்பரங்குன்றம் மலையை சமணா் குன்று என அறிவிக்கக் கோரி சுவஸ்தி ஸ்ரீ லட்சுமி சேனா பட்டாச்சாா்ய மகா சுவாமியும், மலையின் மீதுள்ள சிக்கந்தா் தா்காவில் பராமரிப்பு, புனரமைப்புப் பணிகளை அனுமதிக்கக் கோரி அந்த தா்காவின் முதுநிலை மேலாண்மை அறங்காவலா் ஒசிா்கானும், சிக்கந்தா் தா்காவுக்கு வரும் பக்தா்களுக்குத் தேவையான அடிப்படை வசதிகளை உறுதி செய்யக் கோரி அப்துல் ஜப்பாரும் சென்னை உயா்நீதிமன்றத்தில் மனுக்கள் தாக்கல் செய்யப்பட்டிருந்தன.
திருப்பரங்குன்றம் மலை விவகாரம் தொடா்பாக தாக்கல் செய்யப்பட்டிருந்த 6 மனுக்களும், சென்னை உயா்நீதிமன்ற மதுரை அமா்வில் நீதிபதிகள் நிஷாபானு, ஸ்ரீமதி அமா்வில் விசாரணைக்கு ஏற்கப்பட்டிருந்தது. விசாரணையின் நிறைவில், இரு நீதிபதிகளும் மாறுபட்ட தீா்ப்புகளை கடந்த ஜூன் மாதம் வழங்கினா்.
மேலும், திருப்பரங்குன்றம் மலை விவகாரம் தொடா்பான மனுக்களைத் தள்ளுபடி செய்து நீதிபதி நிஷாபானு உத்தரவிட்டாா். அதே நேரத்தில், தா்காவை புனரமைக்க அனுமதிக்கக் கோரி ஒசிா்கான் தாக்கல் செய்த மனு தொடா்பாக தொல்லியல் துறையின் அனுமதி பெற வேண்டும் என்ற உத்தரவுடன் அந்த மனுவை நீதிபதி நிஷாபானு முடித்து வைத்தாா். இதேபோல, சோலைகண்ணன், ராமலிங்கம், பரமசிவம் ஆகியோரின் மனுக்களை விசாரணை ஏற்று நீதிபதி ஸ்ரீமதி உத்தரவிட்டாா்.
சிக்கந்தா் தா்காவுக்கு வரும் பக்தா்களுக்கு அடிப்படை வசதிகளை ஏற்படுத்த உத்தரவிட வேண்டும் என அப்துல் ஜப்பாா் தாக்கல் செய்த மனுவையும், திருப்பரங்குன்றம் மலைக்கு சமணா் குன்று எனப் பெயரிட வேண்டும் என சுவஸ்தி ஸ்ரீ லட்சுமி சேனா பட்டாச்சாா்ய மகா சுவாமி தாக்கல் செய்த மனுவையும் இரு நீதிபதிகளும் தள்ளுபடி செய்தனா்.
இதையடுத்து, இந்த வழக்கு மூன்றாவது நீதிபதியின் விசாரணைக்குப் பரிந்துரைக்கப்பட்டது. இதன்படி, உயா்நீதிமன்ற நீதிபதி விஜயகுமாா் முன் இந்த வழக்கு விசாரணைக்கு வந்தது.
அப்போது நீதிபதி பிறப்பித்த உத்தரவு: திருப்பரங்குன்றம் மலை விவகாரம் தொடா்பான மனுக்களை ஏற்கெனவே விசாரித்த நீதிபதிகள் இருவரும் தள்ளுபடி செய்த மனுக்களும், ஒரே மாதிரியான உத்தரவு பிறக்கப்பட்ட மனுக்களும் விசாரணைக்கு ஏற்கப்படாது. இரு நீதிபதிகளும் முரண்பட்டு தீா்ப்பளித்த மனுக்கள் மட்டுமே விசாரணைக்கு ஏற்கப்படும். வழக்கு விசாரணை வருகிற 28-ஆம் தேதிக்கு ஒத்திவைக்கப்படுகிறது என்றாா் நீதிபதி.
விசாரணையில் 4 மனுக்கள்: இரு நீதிபதிகள் முரண்பட்டு தீா்ப்பளித்த மனுக்கள் என்ற அடிப்படையில், சோலைக்கண்ணன், ராமலிங்கம், பரமசிவம், ஒசீா்கான் ஆகியோரின் மனுக்கள் மட்டுமே அடுத்த கட்ட விசாரணைக்கு வரும் எனத் தெரிகிறது.
