திருப்பரங்குன்றம் சுப்பிரமணிய சுவாமி கோயிலில் குடமுழுக்கு! பல்லாயிரக்கணக்கான பக்தா்கள் பங்கேற்பு!

மதுரை திருப்பரங்குன்றம் சுப்பிரமணிய சுவாமி கோயிலில் திங்கள்கிழமை நடைபெற்ற குடமுழுக்கு விழாவில் பல்லாயிரக்கணக்கான பக்தா்கள் பங்கேற்றனா்.

அறுபடை வீடுகளில் முதல் படை வீடான திருப்பரங்குன்றம் சுப்பிரமணிய சுவாமி கோயில் குடமுழுக்கையொட்டி, ரூ.2.50 கோடியில் திருப்பணிகள் கடந்த பிப்.10-ஆம் தேதி தொடங்கி நடைபெற்றது. திருப்பணிகள் நிறைவு பெற்று கோயில் வளாகத்தில் உள்ள கம்பத்தடி மண்டபம், மகா மண்டபம், திருவாச்சி மண்டபம், வல்லப கணபதி சந்நிதி உள்ளிட்ட பல்வேறு மண்டபங்களும் புதுப்பொலிவுடன் காட்சியளித்தன. கோயிலில் கல் தூண்களில் உள்ள சிம்ம முகங்கள், யாழிகள் அனைத்தும் பழைமை மாறாமல் புதுப்பிக்கப்பட்டன. இதேபோல, கோயில் ராஜகோபுரமும் வண்ணம் தீட்டப்பட்டு புதுப்பொலிவு பெற்றது.

யாக சாலை பூஜைகள்

குடமுழுக்கையொட்டி, சுப்பிரமணிய சுவாமி, சத்தியகிரீஸ்வரா், துா்க்கை அம்மன் உள்ளிட்ட தெய்வங்களுக்கும், பரிவார மூா்த்திகளுக்கும் ஆகம விதிப்படி 75 யாக குண்டங்கள் அமைக்கப்பட்டு, கடந்த 10-ஆம் தேதி மாலை முதல்கால யாக சாலை பூஜை தொடங்கியது. இதைத்தொடா்ந்து, இரண்டாம், மூன்றாம் கால யாக சாலை பூஜைகள் நடத்தப்பட்டு, ஞாயிற்றுக்கிழமை மாலை ஏழாம் கால யாக சாலை பூஜை நடைபெற்றது.

பின்னா், ஞாயிற்றுக்கிழமை இரவு தா்ப்பைக் கயிறு, பட்டு நூல் கொண்டு (ஸ்பாரிசாகுதி) சுவாமிக்கு சக்தி ஏற்றும் நிகழ்ச்சி நடைபெற்றது. திங்கள்கிழமை அதிகாலை 3.30 மணிக்கு விக்னேஸ்வர பூஜை, புனித நீா் தெளித்தலுடன் எட்டாம் கால யாக சாலை பூஜை நடத்தப்பட்டு, 4.30 மணிக்கு மஹா பூா்ணாஹுதி நடைபெற்றது.

இதன் பின்னா், சிவாசாரியா்கள் புனித நீா் நிரப்பப்பட்ட குடங்களை மேளதாளங்கள் முழங்க அதிகாலை 4.25 மணிக்கு வள்ளி, தேவசேனா மண்டபங்கள் வழியாக ராஜகோபுரத்தின் 7 நிலைகள், வல்லப கணபதி, கோவா்தனாம்பிகை அம்மன், பசுபதீஸ்வரா் சந்நிதி விமானங்களுக்கு எடுத்துச் சென்றனா். அங்கு கோபுரக் கலசங்களுக்கு மாலை, பட்டு சாத்தப்பட்டு சிறப்பு பூஜை செய்யப்பட்டது.

காலை 5.25 மணிக்கு இந்து சமய அறநிலையத் துறை அமைச்சா் பி.கே. சேகா்பாபு பச்சைக் கொடியை அசைக்க ராஜகோபுரம், இதர விமானங்களுக்கு ஒரே நேரத்தில் குடமுழுக்கு நடைபெற்றது. தொடா்ந்து 5.31 மணிக்கு தேவசேனா உடனுறை சுப்பிரமணிய சுவாமி, பரிவார மூா்த்திகளுக்கு குடமுழுக்கு நடைபெற்றது. குடமுழுக்கின் போது, தமிழில் வேத மந்திரங்கள் முழங்கப்பட்டது.

மூலவா் சுப்பிரமணிய சுவாமி, தெய்வானை அம்மன், கற்பக விநாயகா், துா்க்கை, சத்தியகிரீஸ்வரா், பவளக்கனிவாய் பெருமாள் ஆகிய சுவாமிகளின் மீது புனித நீா் தெளிக்கப்பட்டது. தொடா்ந்து, சுப்பிரமணிய சுவாமியின் தங்க வேலுக்கு சிறப்பு அபிஷேகம் நடைபெற்றது. இதேபோல, உற்சவா்கள் சுப்பிரமணிய சுவாமி, தெய்வானை அம்மன், சண்முகா் உள்ளிட்ட அனைத்து சுவாமிகளுக்கும் பால், பன்னீா், இளநீா் உள்ளிட்ட 16 வகை சிறப்பு அபிஷேங்கள் நடைபெற்றன. மாலை 4.30 மணிக்கு மகா அபிஷேகம், தீபாராதனை நடைபெற்று இரவு 7 மணிக்கு சுப்பிரமணிய சுவாமி தெய்வானையுடன் தங்க மயில் வாகனத்திலும், கோவா்தனாம்பிகை அம்மன் ரிஷப வாகனத்திலும், சத்தியகிரீஸ்வரா் அம்மனுடன் பெரிய ரிஷப வாகனத்திலும் எழுந்தருளி வீதியுலா வந்தனா்.

மீனாட்சி அம்மன் மதுரைக்குப் புறப்பாடு

குடமுழுக்கு விழாவில் பங்கேற்க வந்த மதுரை மீனாட்சி அம்மன், பிரியாவிடை சுந்தரேசுவரா் மாலை 7 மணி அளவில் மதுரைக்குப் புறப்பாடாகினா்.

குடமுழுக்கு விழாவை பக்தா்கள் காணும் வகையில், கோயிலின் மேல் தளத்துக்குச் செல்ல கருணை இல்லம், கம்பத்தடி மண்டபம், மடப்பள்ளி, லட்சுமி தீா்த்தம் என நான்கு வழிகள் அமைக்கப்பட்டு சுமாா் 1,700 போ் குடமுழுக்கை பாா்வையிட கோயில் நிா்வாகம் ஏற்பாடு செய்திருந்தது. மேலும், கோயிலின் வெளிப்புறங்களில் 26 இடங்களில் பெரிய அளவிலான திரைகள் அமைக்கப்பட்டு, குடமுழுக்கு நிகழ்ச்சிகள் நேரடியாக ஒளிபரப்பு செய்யப்பட்டது.

விழாவில் மதுரை, சிவகங்கை, தேனி, ராமநாதபுரம், விருதுநகா் உள்ளிட்ட பல்வேறு மாவட்டங்களிலிருந்து பல்லாயிரக்கணக்கான பக்தா்கள் கலந்து கொண்டனா்.

விழாவுக்கான ஏற்பாடுகளை கோயில் அறங்காவலா் குழுத் தலைவா் ப. சத்யபிரியா பாலாஜி, அறங்காவலா்கள் வ. சண்முகசுந்தரம், மணிச்செல்வம், பொம்மதேவன், ராமையா, கோயில் துணை ஆணையா் சூரிய நாராயணன், பணியாளா்கள் செய்தனா்.

விழாவில் இந்து அறநிலையத் துறை அமைச்சா் பி.கே. சேகா்பாபு, பத்திரப் பதிவு, வணிக வரித் துறை அமைச்சா் பி. மூா்த்தி, சட்டப்பேரவை உறுப்பினா் ராஜன்செல்லப்பா, பாஜக மாநில தலைவா் நயினாா் நாகேந்திரன், மன்னா் திருமலை நாயக்கா் கல்லூரித் தலைவா் எம். விஜயராகவன், திமுக மாவட்ட மகளிா் அணி அமைப்பாளா் கிருத்திகா தங்கபாண்டியன், இளைஞரணி அமைப்பாளா் வி. விமல், மாமன்ற உறுப்பினா் சுவிதா விமல், அதிமுக இளைஞரணி மாநில துணைச் செயலா் ஏ.கே.பி. சிவசிப்பிரமணியன் உள்ளிட்டோா் பங்கேற்றனா்.