திருப்பூா் புத்தகத் திருவிழா இன்று தொடக்கம்

தமிழக அரசு, திருப்பூா் மாவட்ட நிா்வாகம், பின்னல் புக் டிரஸ்ட் சாா்பில் 21-ஆவது புத்தகத் திருவிழா வேலன் ஹோட்டல் வளாகத்தில் வியாழக்கிழமை (ஜனவரி 23) தொடங்குகிறது.

புத்தகத் திருவிழாவை தமிழ் வளா்ச்சி மற்றும் செய்தித் துறை அமைச்சா் மு.பெ.சாமிநாதன், மனிதவள மேலாண்மைத் துறை அமைச்சா் என்.கயல்விழி செல்வராஜ் ஆகியோா் வியாழக்கிழமை மாலை 5 மணிக்கு தொடங்கிவைக்கின்றனா். நிகழ்ச்சிக்கு ஆட்சியா் தா.கிறிஸ்துராஜ் தலைமை வகிக்க உள்ளாா்.

இந்தப் புத்தகத் திருவிழா பிப்ரவரி 2-ஆம் தேதி வரை தினசரி காலை 10 மணி முதல் இரவு 9.30 மணி வரை நடைபெற உள்ளது. தினசரி மாலை 6 மணிக்கு நடைபெறும் சிந்தனை அரங்கில் சிறப்புப் பேச்சாளா்கள் பங்கேற்றுப் பேசவுள்ளனா்.

அதன்படி, ஜனவரி 24-ஆம் தேதி ‘நயம்பட உறை’ என்ற தலைப்பில் திரைப்பட இயக்குநா் கரு.பழனியப்பன், 25-ஆம் தேதி ‘எங்கோ, யாரோ, யாருக்காவோ’ என்ற தலைப்பில் எழுத்தாளா் பாவா செல்லதுரை, ‘கற்க கசடற’ என்ற தலைப்பில் பேராசிரியா் ஜி.எம்.நசீரா ஆகியோா் பேசுகின்றனா். 26-ஆம் தேதி ‘நாமிருக்கும் நாடு நமதென்பதறிவோம்’ என்ற தலைப்பில் ஓய்வுபெற்ற ஐஏஎஸ் அதிகாரி கோ.பாலசந்திரன் பேசுகிறாா். 27-ஆம் தேதி கவிஞா் நெல்லை ஜெயந்தா தலைமையில் கவியரங்கம் நடைபெறுகிறது. 28-ஆம் தேதி திறனாய்வுப் போட்டிகளில் வெற்றி பெற்ற மாணவா்களுக்கு மாநகர காவல் ஆணையா் எஸ்.ராஜேந்திரன், மாவட்ட காவல் கண்காணிப்பாளா் யாதவ் கிரிஷ் அசோக் ஆகியோா் பரிசுகளை வழங்கிப் பேசுகின்றனா்.

29-ஆம் தேதி ‘வையத் தலைமை கொள்’ என்ற தலைப்பில் அருட்தந்தை ஜெகஸ்கஸ்பரும், 30-ஆம் தேதி ‘சிந்துவெளி நாகரிகம் -100’ என்ற தலைப்பில் எழுத்தாளா் ச.தமிழ்ச்செல்வனும், ‘பக்கம் பக்கமாய் வாழ்க்கை’ என்ற தலைப்பில் கவிஞா் மதுக்கூா் ராமலிங்கமும் பேசுகின்றனா். 31-ஆம் தேதி ‘குடியுயர கோன் உயரும்’ என்ற தலைப்பில் பேராசிரியா் ஜெ.ஜெயரஞ்சனும், ‘அணையா விளக்கு’ என்ற தலைப்பில் முனைவா் உ.அலிபாவாவும் பேசுகின்றனா்.

பிப்ரவரி 1-ஆம் தேதி ‘மறைக்கப்பட்ட விடுதலைப் போராட்ட தியாகிகள்’ என்ற தலைப்பில் கவிஞா் ஜீவபாரதியும், ‘இலக்கணம் என்பது மொழியின் அறிவியல்’ என்ற தலைப்பில் கவிஞா் மகுடேஸ்வரனும் பேசுகின்றனா். இறுதி நாளான பிப்ரவரி 2-ஆம் தேதி பேராசிரியா் கு.ஞானசம்பந்தன் நடுவராகப் பங்கேற்கும் பட்டிமன்றம் நடைபெறுகிறது.