தருமபுரி: தருமபுரி மாவட்ட மைய நூலகத்தில் திருவள்ளுவா் புகைப்படக் கண்காட்சியை மாவட்ட ஆட்சியா் கி.சாந்தி திறந்து வைத்தாா்.
கன்னியாகுமரியில் திருவள்ளுவரின் 133 அடி உயர சிலை அமைத்து 25 ஆண்டுகள் நிறைவடைந்துள்ளதை முன்னிட்டு, தமிழக அரசு சாா்பில் மாநிலம் முழுவதும் வெள்ளி விழா கொண்டாடப்பட்டு வருகிறது.
இதையொட்டி, தருமபுரி மாவட்ட மைய நூலகத்தில் திங்கள்கிழமை நடைபெற்ற நிகழ்ச்சிக்கு ஆட்சியா் கி.சாந்தி தலைமை வகித்தாா். அப்போது திருவள்ளுவா் படத்துக்கு மாலை அணிவித்து மரியாதை செலுத்தி, புகைப்படக் கண்காட்சியை திறந்து வைத்து அவா் பேசியதாவது:
தருமபுரி மாவட்ட மைய நூலகத்தில் டிச. 23 முதல் 31 வரை திருவள்ளுவா் புகைப்படம் காட்சிப்படுத்தப்பட்டு திருக்குறளின் பெருமைகளை உணா்த்தும் நிகழ்ச்சி நடைபெற உள்ளது.
இதில், டிச. 24-ஆம் தேதி ‘உள்ளுவதெல்லாம் உயா்வுள்ளல்’ என்ற தலைப்பில் கல்லூரி மாணவா்களுக்கான கருத்தரங்கம், டிச. 26-ஆம் தேதி திருக்கு ஒப்புவித்தல் போட்டி (1-ஆம் வகுப்பு முதல் 9-ஆம் வகுப்பு வரை பயிலும் மாணவா்கள் கலந்துகொள்ளலாம்), டிச. 27-ஆம் தேதி விநாடி - வினா (9-ஆம் வகுப்பு முதல் பிளஸ் 2 வகுப்பு வரை பயிலும் மாணவா்கள் கலந்துகொள்ளலாம்), டிச. 28-ஆம் தேதி ‘அன்பும் அறனும்’ என்ற தலைப்பில் கல்லூரி மாணவா்களுக்கான கருத்தரங்கம், டிச. 29-ஆம் தேதி ‘உழுதுண்டு வாழ்வாரே’ என்ற தலைப்பில் கல்லூரி மாணவா்களுக்கான கருத்தரங்கம், டிச. 30-ஆம் தேதி ‘குமரியில் வள்ளுவா் சிலையும் குறளில் அதிகாரவைப்பு முறையும்’ என்ற தலைப்பில் பேச்சுப் போட்டி (6-ஆம் வகுப்பு முதல் 10-ஆம் வகுப்பு வரை பயிலும் மாணவா்கள் கலந்துகொள்ளலாம்) ஆகிய போட்டிகள் நடைபெற உள்ளன.
இந்தப் போட்டிகளில் வெற்றிபெறும் மாணவா்களுக்கு முதல் பரிசாக ரூ. 5,000, இரண்டாம் பரிசாக ரூ. 3,000, மூன்றாம் பரிசாக ரூ. 2,000 வீதம் ரொக்கம், சான்றிதழ் டிச. 31-ஆம் தேதி நடைபெறும் நிறைவு விழாவில் வழங்கப்படும் என்றாா்.
இந்த நிகழ்ச்சியில், தருமபுரி தகடூா் புத்தகப் பேரவைச் செயலாளா், முன்னாள் எம்.பி. இரா.செந்தில், மாவட்ட முதன்மைக் கல்வி அலுவலா் ஜோதிச்சந்திரா, மாவட்ட நூலக அலுவலா் அர.கோகிலவாணி, அலுவலா்கள், பள்ளி, கல்லூரி மாணவ, மாணவியா் கலந்துகொண்டனா்.
