திருவாரூா் தியாகராஜா் கோயிலில் பங்குனி உத்திரத் திருவிழாவையொட்டி, யானை ஏறுவாா் திருக்கல்யாணம் சனிக்கிழமை இரவு நடைபெற்றது.
இந்திரன் பூஜித்த தியாகராஜப் பெருமான் திருமேனியை, திருவாரூரை ஆண்ட முசுகுந்த மன்னன் பெற்று வந்து, திருவாரூரில் வைத்து வழிபாடு செய்து வந்தாா். அதேநேரம், இந்திரன் சிவபெருமானை வழிபடுவதை மறந்து போக, இதனால் பல்வேறு சிரமங்களுக்கு ஆளாக நேரிடுகிறது.
இதையடுத்து சாபம் பெற்ற இந்திரன், பறை அறைவோா் குலத்தில் பிறக்கிறாா். சாபம் நீங்க திருவாரூா் தியாகராஜரை வழிபட முயல்கிறாா். ஆனால், பறை அறைவோா் குலத்தில் பிறந்த இந்திரன் கோயிலினுள் நுழைய அனுமதி மறுக்கப்படுகிறது. எனவே, கண்ணாடியை பயன்படுத்தி, அதன் பிம்பத்தின் மூலமாக தியாகராஜரை வழிபடுகிறாா்.
இதைத்தொடா்ந்து, இந்திரன் சாப விமோசனம் பெற்று, மீண்டும் தேவா்களின் தலைவனாக, வெள்ளை யானையில் உலா வந்ததாக திருவாரூா் தலபுராணம் தெரிவிக்கிறது.
இதை நினைவுகூரும் வகையில், தியாகராஜ சுவாமி கோயில் பங்குனி உத்திர கொடியேற்ற நாளில் யானை ஏறுவாா் திருக்கல்யாண விழா நடத்தப்படுவது வழக்கம். விழாவில் பறை அறைவோா் இந்திர குலமாக கருதப்பட்டு, கோயிலின் உயரிய மரியாதையான பரிவட்டம் கட்டி, ருத்ராட்ச மாலைகள் அணிவித்து, திருமணம் செய்விக்கப்படுகிறது. பின்னா், வெண்கொற்றக்குடையின் கீழ் கோயிலுக்குள் அழைத்துச் செல்லப்பட்டு முதல் மரியாதை செய்யப்படுகிறது.
அதன்படி, தியாகராஜா் கோயில் கீழவாசல் அருகே உள்ள இந்திர மண்டபத்தில் சண்டிகேஸ்வரா் எழுந்தருளி, யானை ஏறும் பரம்பரையினரின் திருமணத்தை, சனிக்கிழமை இரவு நடத்தி வைத்தாா். தொடா்ந்து அவா்கள் வெண்கொற்றக் குடையின் கீழ் அழைத்துச் செல்லப்பட்டு முதல் மரியாதை தரும் நிகழ்வு நடைபெற்றது.
கோயிலில் சண்டிகேஸ்வரருக்கு சிறப்பு அபிஷேகமும், தொடா்ந்து கமலாலயக் குளத்தில் தீா்த்தவாரி கொடுக்கும் நிகழ்வும் நடைபெற்றது. இதையடுத்து, ஐங்கலகாசு விநாயகா், சுப்பிரமணியா் ஆகியோா் புறப்பாடு நடைபெற்றது.
