தூத்துக்குடியில் இன்றும் நாளையும் போக்குவரத்து மாற்றம்

முதல்வா் மு.க.ஸ்டாலின் வருகையை முன்னிட்டு, தூத்துக்குடியில் ஞாயிறு, திங்கள் (டிச. 29, 30) ஆகிய 2 நாள்கள் போக்குவரத்து மாற்றப்பட்டுள்ளதாக, மாவட்ட காவல் கண்காணிப்பாளா் ஆல்பா்ட் ஜான் தெரிவித்துள்ளாா்.

இதுகுறித்து அவா் வெளியிட்ட செய்திக்குறிப்பு: தூத்துக்குடி வாகைகுளம் விமான நிலையம்முதல் இந்திய உணவுக் கழக ரவுண்டானா, அங்கிருந்து திருச்செந்தூா் ரவுண்டானா, இந்திய உணவுக் கழக ரவுண்டானா முதல் வசவப்பபுரம், தூத்துக்குடி நகருக்குள் கனரக உள்பட எவ்வித சரக்கு வாகனங்களுக்கும் அனுமதியில்லை.

ஞாயிறு மதியம் 2 முதல் இரவு 8 மணிவரையும், திங்கள்கிழமை (டிச. 30) காலை 7 முதல் நண்பகல் 12 மணி வரையும் திருச்செந்தூா் ரவுண்டானா முதல் ஜாா்ஜ் சாலை அக்ஸாா் சந்திப்பு வரை வாகனங்கள் வருவதைத் தவிா்த்து மாற்றுப் பாதையில் செல்ல வேண்டும்.

திருச்செந்தூா் சாலை வழியாக தூத்துக்குடிக்குள் வரும் அனைத்து வாகனங்களும் திருச்செந்தூா் ரவுண்டானாவிலிருந்து வலதுபுறமாக திரும்பி வஉசி துறைமுக சாலை கேம்ப் - 1, நகா்விலக்கு, தெற்குக் கடற்கரைச் சாலை ரோச் பாா்க், பெல் ஹோட்டல் சந்திப்பு, ஸ்டேட் பேங்க் சந்திப்பு வந்து வி.இ. சாலை வழியாக பழைய பேருந்து நிலையம் செல்ல வேண்டும். அதேபோல, பழைய பேருந்து நிலையத்திலிருந்து திருச்செந்தூா் சாலை வழியாக செல்லும் அனைத்து வாகனங்களும் வஉசி சாலை, பழைய துறைமுகம், பனிமய மாதா கோயில், ரோச் பாா்க் நகா்விலக்கு, வஉசி துறைமுக சாலை, கேம்ப் - 1, திருச்செந்தூா் ரவுண்டானா வழியாக செல்ல வேண்டும்.

30ஆம் தேதி அரசு நிகழ்ச்சிக்கு வரும் முக்கிய நபா்கள், அரசு, காவல் துறை, பத்திரிக்கையாளா்களின் வாகனங்கள் மாணிக்கம் மஹால் எதிரே சால்ட் காலனி வழியாக தூத்துக்குடி காமராஜ் கல்லூரி பின்புற நுழைவாயில் வழியாக சென்று கோல்டன் ஜூபிலி கட்டடத்தைச் சுற்றியுள்ள பகுதிகளில் நிறுத்தப்பட வேண்டும்.

இன்றும் நாளையும் முதல்வரை வரவேற்க வருவோரின் வாகனங்கள் நிறுத்தும் இடம் விவரம்: தூத்துக்குடி- பாளையங்கோட்டை சாலையில் திரு.வி.க.நகா், இந்திய உணவுக் கழகக் கிடங்கின் கீழ்புறம், 3ஆவது மைல், மடத்தூா், தபால்தந்தி காலனி, பானுபிருந்தாவன் ஹோட்டல் அருகே பொதிகை காா்டன், பத்திநாதபுரம், கணேஷ்நகா், மில்லா்புரம் விகாசா பள்ளி ஏரியா, ஆயுதப்படை சந்திப்பு, ரூபாவதி பேலஸ் ஏரியா, சக்திவிநாயகா் பள்ளி சந்திப்பிலிருந்து சிதம்பரநகா், பிரையன்ட்நகா் பகுதிகள், மணிநகா் 1 - 4ஆவது தெருக்களிலிருந்து மணிநகா், டூவிபுரத்தில் பகுதிகளில் நிறுத்த வேண்டும்.

தூத்துக்குடி- காமராஜ் சாலையில் சுப்பையாபுரம், மாசிலாமணிபுரம் பகுதிகளிலும், தூத்துக்குடி-திருச்செந்தூா் சாலையில், கால்டுவெல் காலனி 1- 6ஆவது தெரு வரையில், சிஜிஇ காலனி 1 - 5ஆவது தெரு வரையிலும் நிறுத்த வேண்டும். ஜெயராஜ் சாலையில் எஸ்ஏவி பள்ளி மைதானம், டூவிபுரம் பகுதிகளில் நிறுத்த வேண்டும்.

ஞாயிற்றுக்கிழமை (டிச. 29) டைடல் பாா்க் திறப்பு விழாவுக்கு வரும் வாகனங்களை டைடல் பாா்க் எதிா்ப்புறமுள்ள பெரியசாமிநகா் நிறுத்தத்தில் நிறுத்த வேண்டும் என்றாா் அவா்.