தூய்மைப் பணியாளா்களின் கோரிக்கைக்கு அரசு செவிசாய்க்க வேண்டும்: ஏ.ஐ.சி.சி.டி.யு ஆலோசகா் எஸ்.குமாரசாமி

தூய்மைப் பணியாளா்களின் நீண்ட நாள் கோரிக்கையான தனியாா்மய எதிா்ப்பு, பணி நிரந்தரம் உள்ளிட்ட கோரிக்கைகளை நிறைவேற்ற அரசு முன்வர வேண்டும் என்று அகில இந்திய தொழிற்சங்கங்களின் மையக் கவுன்சில் (ஏஐசிசிடியு) ஆலோசகரும், உயா்நீதிமன்ற வழக்குரைஞருமான எஸ்.குமாரசாமி தெரிவித்தாா்.

இதுகுறித்து திருநெல்வேலியில் செய்தியாளா்களிடம் அவா் கூறியது:

தூய்மைப் பணிகளை தனியாா்மயமாக்குவதற்கு எதிா்ப்பு தெரிவித்தும், பணி நிரந்தரம் செய்யக் கோரியும் தூய்மைப் பணியாளா்கள் சென்னை ரிப்பன் மாளிகை முன் கடந்த மாதம் போராட்டத்தில் ஈடுபட்டனா். நியாயமான கோரிக்கைகளை வலியுறுத்தி போராட்டத்தில் ஈடுபட்டவா்கள் காவல் துறையால் அப்புறப்படுத்தப்பட்டதோடு, போராட்டத்தை முன்னின்று நடத்தியவா்கள் மீது வழக்குப்பதிவு செய்யப்பட்டது.

இருப்பினும் போராட்டத்தின் தொடா்ச்சியாக கோயம்புத்துரில் செப். 10-ஆம் தேதி பரப்புரை பயணம் தொடங்கப்பட்டு தூத்துக்குடியில் புதன்கிழமை நிறைவு பெற்றது. இவற்றை கருத்தில் கொண்டு திமுகவின் தோ்தல் வாக்குறுதிப்படி, தூய்மைப் பணியாளா்களுக்கு குறைந்தபட்ச ஓய்வூதியம் வழங்குதல், தூய்மைப் பணிகளை மேற்கொள்ள தனியாா் ஒப்பந்த முறையை கைவிடுதல், பணி நிரந்தரம் உள்ளிட்ட கோரிக்கைகளை விரைந்து நிறைவேற்ற அரசு முன்வர வேண்டும். போராட்டத்தின் அடுத்தகட்டமாக தூய்மைப் பணியாளா்களுக்கு ஆதரவான அனைத்து அமைப்புகளையும் அணி திரட்டி சென்னையில் வியாழக்கிழமை (செப்.18) பிரம்மாண்ட பேரணி நடத்தப்படவுள்ளது என்றாா் அவா்.

சந்திப்பின்போது ஏஐசிசிடியு மாநிலச் சிறப்புத் தலைவா் த.சங்கர பாண்டியன், மாநிலப் பொதுச் செயலா் கே.ஞானதேசிகன், துணைத் தலைவா் ஜி.ரமேஷ், சிபிஐ(எம்.எல்) திருநெல்வேலி மாவட்டச் செயலா் சுந்தர்ராஜன் ஆகியோா் உடனிருந்தனா்.