தேனியில் நடப்போம் நலம்பெறுவோம் திட்ட 100-ஆவது நடைப்பயிற்சி -பொதுமக்கள் பங்கேற்க அழைப்பு

தேனியில் நடப்போம் நலம் பெறுவோம் திட்டத்தின் கீழ் ஞாயிற்றுக்கிழமை (நவ. 3) நடைபெறும் 100- ஆவது நடைப்பயிற்சியில் பொதுமக்கள், தன்னாா்வலா்கள் பங்கேற்கலாம் என தேனி மாவட்ட ஆட்சியா் ஆா்.வி. ஷஜீவனா அழைப்பு விடுத்தாா்.

இதுகுறித்து அவா் வெளியிட்ட செய்திக்குறிப்பு:

நடைப் பயிற்சியை ஊக்குவிக்கும் வகையில் தமிழக முதல்வா் மு.க. ஸ்டாலின் அனைத்து மாவட்டங்களிலும் 8 கி.மீ. தொலைவு கொண்ட நடைப்பயிற்சி பாதைகள் உருவாக்கப்படும் என தெரிவித்திருந்தாா்.

தேனி மாவட்டத்தில் தேனி அரண்மனைப்புதூரில் 8 கி.மீ. தொலைவுக்கான நடைப்பயிற்சி பாதை கண்டறியப்பட்டு, மாவட்ட ஆட்சியா் ஆா்.வி. ஷஜீவனா நடைப்பயிற்சியை தொடங்கி வைத்தாா்.

பொதுமக்களிடையே தினசரி நடைப்பயிற்சி பழக்கத்தை ஊக்கப்படுத்தவும், நடைப்பயிற்சியின் முக்கியத்துவம் குறித்து விழிப்புணா்வு ஏற்படுத்தவும் மாவட்ட ஆட்சியா் தலைமையில் வாரந்தோறும் ஞாயிற்றுக்கிழமை மற்றும் அரசின் முக்கிய விழிப்புணா்வு நிகழ்வுகளின்போது தேனி மாவட்டத்தில் உள்ள பல்வேறு இடங்களில் 8 கி.மீ. தொலைவு நடைப்பயிற்சி மேற்கொள்ளப்பட்டது. இதுவரை 99 நடைப்பயிற்சியில் மாவட்ட ஆட்சியா் கலந்து கொண்டாா்.

வருகிற ஞாயிற்றுக்கிழமை (நவ. 3) 100-ஆவது நடைப்பயிற்சி மாவட்ட ஆட்சியா் தலைமையில் அரண்மனைப்புதூா் பகுதியில் நடைபெறுகிறது. இதில், பொதுமக்கள், தன்னாா்வலா்கள் என அனைவரும் கலந்து கொள்ளலாம் என்றாா் அவா்.