பணவீக்கம் தளர்வு, வங்கி, எரிசக்தி பங்குகள் கொள்முதல் ஆகியவற்றால் மீண்டெழுந்த சென...
சிதம்பரம் ஶ்ரீநடராஜர் கோயிலில் மார்கழி ஆருத்ரா தரிசனத்தை முன்னிட்டு பல்லாயிரக்கணக்கானோர் பங்கேற்றனர்.
ஸ்ரீமந்நடராஜமூர்த்தியும், ஸ்ரீசிவகாமசுந்தரி அம்பாளும் ஆயிரங்கால் மண்டபத்தின் முன்பு உள்ள நடனப்பந்தலில் நடனமாடி ஆருத்ரா தரிசன காட்சியளித்தனர். பல்லாயிரக்கணக்கான பக்தர்கள் பங்கேற்று 'நடராஜா', 'சிவசிவா' என கோஷமிட்டு தரிசனத்தை கண்டுகளித்தனர்.
ஸ்ரீநடராஜர் கோயில் ஆருத்ரா தரிசன உத்சவம் கடந்த ஜன.4-ம் தேதி கொடியேற்றத்துடன் தொடங்கியது. ஜன.12-ம் தேதி ஞாயிற்றுக்கிழமை தேர்த்திருவிழா விமரிசையாக நடைபெற்றது. பின்னர் இரவு ஆயிரங்கால் மண்டபத்தில் ஸ்ரீமந்நடராஜமூர்த்திக்கும், ஸ்ரீசிவகாமசுந்தரி அம்பாளுக்கும் ஏககால லட்சார்ச்சனை நடைபெற்றது. ஜன.13-ம் தேதி திங்கள்கிழமை அதிகாலை சூரிய உதயத்திற்கு முன்பு ஆயிரங்கால் மண்டபம் முகப்பில் ஶ்ரீநடராஜமூர்த்திக்கும், ஶ்ரீசிவகாமசுந்தரி அம்பாளுக்கும் மகாபிஷேகம் நடைபெற்றது. பால், தேன், விபூதி, பஞ்சாமிர்தம், இளநீர், சந்தனம் உள்ளிட்டவை குடகுடமாக அபிஷேகம் செய்யப்பட்டது. காலை 4.00 மணிக்கு தொடங்கிய மகாபிஷேகம் 9.00 மணிக்கு முடிவுற்றது. மகாபிஷேகத்தை ஆயிரக்கணக்கான பக்தர்கள் பார்த்து தரிசித்தனர்.
பின்னர் ஆயிரங்கால் மண்டபத்தில் ஸ்ரீ நடராஜமூர்த்திக்கும், ஸ்ரீ சிவகாமசுந்தரி அம்பாளுக்கும் திருவாபரண அலங்காரமும், சிறப்பு அர்ச்சனைகளும் நடைபெற்றன. சிதசபையில் உத்சவ ஆச்சாரியாரால் ரகசிஸ பூஜை நடத்தப்பட்டது. பஞ்சமூர்த்திகள் வீதிஉலா வந்த பின்னர் மாலை 4.10 மணிக்கு ஆயிரங்கால் மண்டபத்தில் எழுந்தருளியுள்ள ஸ்ரீமந்நடராஜமூர்த்தியும், ஸ்ரீசிவகாமசுந்தரி அம்பாளும் நடனப்பந்தலில் முன்னும், பின்னும் 3 முறை சென்று நடனமாடி ஆருத்ரா தரிசன காட்சியளித்தனர். பின்னர் சித்சபா பிரவேசம் நடைபெற்றது. தரிசனக் காட்சியை பல்லாயிரக்கணக்கான பக்தர்கள் கண்டு களித்தனர். ஜன.14-ம் தேதி செவ்வாய்க்கிழமை முத்துப்பல்லக்கு வீதிஉலா காட்சி நடைபெறுகிறது. ஜன.15-ம் தேதி புதன்கிழமை 22 ஆண்டுகளுக்கு பிறகு தூர்வாரி புணரமைக்கப்பட்ட ஞானப்பிரகாசர் தெப்ப குளத்தில், தெப்பல் உற்சவம் நடைபெறுகிறது. மார்கழி ஆருத்ரா தரிசனத்தை முன்னிட்டு நான்கு கோபுரங்கள், ஆயிரங்கால் மண்டபம் மற்றும் கோயில் வளாகம் மின்விளக்குகளால் அலங்கரிக்கப்பட்டு ஜொலித்தது.
உத்சவ ஏற்பாடுகளை பொதுதீட்சிதர்களின் கமிட்டி செயலாளர் உ.வெங்கடேச தீட்சிதர், துணைச்செயலாளர் து.ந.சுந்தரதாண்டவ தீட்சிதர், உற்சவ ஆச்சாரியார் ச.க.சிவராஜ தீட்சிதர் ஆகியோர் செய்திருந்தனர். கடலூர் மாவட்ட காவல் கண்காணிப்பாளர் எஸ்.ஜெயக்குமார் மேற்பார்வையில் சிதம்பரம் டிஸ்பி டி.அகஸ்டின் ஜோஸ்வா லாமேக் தலைமையில் போலீஸ் இன்ஸ்பெக்டர் எஸ்.ரமேஶ்பாபு மற்றும் ஆயிரக்கணக்கான போலீஸார் பாதுகாப்பு ஏற்பாடுகளை செய்திருந்தனர். குடிநீர் மற்றும் சுகாதார ஏற்பாடுகளை நகரமன்ற தலைவர் கே.ஆர்.செந்தில்குமார் ஆணையின் பேரில் ஆணையாளர் டி. மல்லிகா செய்திருந்தார்.
படவிளக்கம்- சிதம்பரம் நடராஜர் கோயில் மார்கழி ஆருத்ரா தரிசனத்தில் சிவகாமசுந்தரி சமேத நடராஜப் பெருமானின் நடனத்தை காண திரண்ட பக்தர்கள்
