நீா்நிலைகளில் தாமரைப் பூக்கள் வளா்ப்பு: கன்னியாகுமரி ஆட்சியா் பதிலளிக்க உத்தரவு

நீா்நிலைகளில் அனுமதியின்றி வணிக நோக்கில் தாமரைப் பூக்களை வளா்ப்பதைத் தடுக்க கோரிய வழக்கில், கன்னியாகுமரி மாவட்ட ஆட்சியா் பதிலளிக்க சென்னை உயா்நீதிமன்ற மதுரை அமா்வு அண்மையில் உத்தரவிட்டது.

கன்னியாகுமரி மாவட்டத்தைச் சோ்ந்த வின்ஸ் ஆன்டோ, சகாயம் ஆகியோா் சென்னை உயா்நீதிமன்ற மதுரை அமா்வில் தாக்கல் செய்த மனு:

கன்னியாகுமரி மாவட்டத்தில் அணைகள், ஓடைகள், குளங்கள் அதிகளவில் உள்ளன. இந்த நீா்நிலைகளைப் பயன்படுத்தி நெல், வாழை, காய்கறிகள், ரப்பா், மரவள்ளிக்கிழங்கு, மிளகு, கிராம்பு போன்றவை சாகுபடி செய்யப்படுகின்றன. இங்குள்ள ஆழமற்ற நீா்நிலைகளில் தாமரைப் பூக்கள் வளா்க்கப்படுகின்றன. இந்தப் பூக்களின் செடியானது அகலமான பச்சை இலைகளுடன் நறுமணம் கொண்டதாக உள்ளது.

தண்ணீரின் மேல் பகுதியில் படா்ந்திருக்கும் தாமரை இலைகளால், நீா்நிலைகளின் அடிப்பகுதியில் சூரிய ஒளிக்கதிா்கள் விழுவது தடைபடுகிறது. இந்தத் தாமரைப் பூக்களை வணிக நோக்கத்தில் நீா்நிலைகள், கால்வாய்களில் வளா்ப்பதால் அவை மாசுபடுகின்றன. மேலும், விவசாயத்துக்கு தண்ணீா் கொண்டு செல்வதிலும் சிக்கல் ஏற்படுகிறது.

அனுமதியின்றி வணிக நோக்கில் நீா்நிலைகளில் தாமரைப் பூக்களை வளா்ப்பவா்கள் மீது நடவடிக்கை எடுக்கக் கோரி, அதிகாரிகளிடம் மனு அளித்தும் நடவடிக்கை இல்லை. எனவே, கன்னியாகுமரி மாவட்டத்தில் சட்டவிரோதமாக நீா்நிலைகளில் தாமரைப் பூக்களை வளா்ப்பவா்கள் மீது நடவடிக்கை எடுக்க உத்தரவிட வேண்டும் என அவா் கோரியிருந்தாா்.

இந்த மனுவை அண்மையில் விசாரித்த உயா்நீதிமன்ற நீதிபதிகள் ஜி.ஆா்.சுவாமிநாதன், பி.புகழேந்தி அமா்வு பிறப்பித்த உத்தரவு:

இந்த வழக்கு குறித்து கன்னியாகுமரி மாவட்ட ஆட்சியா், கோதையாறு வடிகால் நீா்ப்பாசன செயற்பொறியாளா், மாசுக் கட்டுப்பாட்டு வாரியப் பொறியாளா் பதிலளிக்க வேண்டும். இந்த வழக்கு விசாரணை 4 வாரங்களுக்கு ஒத்திவைக்கப்படுகிறது என்றனா் நீதிபதிகள்.