பள்ளி கிணற்றில் மாணவா் சடலமாக மீட்பு!

திருப்பத்தூரில் உள்ள அரசு நிதியுதவி மேல்நிலைப் பள்ளியின் கிணற்றில் மாணவா் மா்மமான முறையில் இறந்து கிடந்தாா். இதையடுத்து மாணவரின் உறவினா்கள் சாலை மறியலில் ஈடுபட்டனா்.

நாட்டறம்பள்ளி அருகே கொத்தூா் கிராமத்தை சோ்ந்தவா் சின்னதம்பியின் மகன் முகிலன் (16). இவா் திருப்பத்தூரில் உள்ள ஒரு அரசு நிதியுதவி மேல்நிலைப் பள்ளியில் 11-ஆம் வகுப்பு பயின்று வந்தாா். மேலும், அந்த பள்ளி வளாகத்தில் உள்ள விடுதியில் தங்கி பயின்று வந்தாா். இந்த நிலையில், கடந்த 1-ஆம் தேதி முகிலன் வகுப்புக்கு வராததால் பள்ளி ஆசிரியா்கள் மாணவனின் பெற்றோருக்கு கைப்பேசி மூலம் தகவல் தெரிவித்துள்ளனா். இதனால் அதிா்ச்சி அடைந்த முகிலனின் பெற்றோா் பள்ளிக்கு வந்து விசாரித்து உள்ளனா். அதைத் தொடா்ந்து, பல்வேறு இடங்களில் தேடியுள்ளனா். மேலும் சம்பவம் குறித்து திருப்பத்தூா் நகர காவல் நிலையத்தில் புகாா் அளித்தனா். புகாரின்பேரில், போலீஸாா் வழக்குப் பதிந்து முகிலனை தேடி வந்தனா்.

இந்த நிலையில் மாணவரை கண்டுபிடிக்க வேலூரில் இருந்து ஞாயிற்றுக்கிழமை மோப்ப நாய் வரவழைக்கப்பட்டது. அது பள்ளி வளாகத்தில் உள்ள இரும்பால் செய்யப்பட்ட வலைகள் மூலம் பூட்டப்பட்ட கிணற்றின் அருகே சென்று நின்றது. போலீஸாா் கிணற்றின் உள்ளே பாா்த்தபோது மாணவரின் சடலம் கிணற்றில் மிதந்தது தெரியவந்தது. தீயணைப்பு வீரா்கள் சடலத்தை மீட்டபின், திருப்பத்தூா் அரசு மருத்துவமனைக்கு அனுப்பி வைத்தனா்.

இதனிடையே முகிலனின் உடலில் ஆங்காங்கே காயங்கள் இருந்ததாகவும், தடயவியல் துறையினா் ஆய்வு செய்து, அதன்பின் பிரேதப் பரிசோதனை செய்ய வேண்டும் எனவும் முகிலனின் உறவினா்கள் கோரிக்கை விடுத்தனா். அதன்பேரில், அடுக்கம்பாறையில் இருந்து மருத்துவா் பாலாஜி தலைமையிலான மருத்துவக் குழு திருப்பத்தூா் அரசு மருத்துவமனைக்கு வந்தது.

சாலை மறியல்

இந்த நிலையில், முகிலனின் உறவினா்கள், அதிமுக, பாஜக, தவெக, பாமக உள்ளிட்ட கட்சியினா் திருப்பத்தூா் நகர காவல் நிலையம் முன்பு மறியல் போராட்டத்தில் ஈடுப்பட்டனா். அப்போது எஸ்.பி.-க்கள் சியாமளா தேவி(திருப்பத்தூா்), மயில்வாகணன் (வேலூா்) தலைமையிலான போலீஸாா் மறியலில் ஈடுப்பட்டவா்களிடம் பேச்சு நடத்தினா். இதையடுத்து அவா்கள் மறியலை கைவிட்டனா்.

முன்னாள் அமைச்சா் கே.சி.வீரமணி முகிலனின் பெற்றோரை சந்தித்து ஆறுதல் கூறினாா். மேலும், உரிய விசாரணை செய்து, நடவடிக்கை எடுக்க போலீஸாரை வலியுறுத்தினாா். இதைத் தொடா்ந்து திமுக நகர செயலாளா் எஸ்.ராஜேந்திரன் முகிலனின் பெற்றோரை சந்தித்து ஆறுதல் கூறினாா்.