பஹல்காமில் படுகாயமடைந்த தமிழக மருத்துவா் குணமடைவாா்: தில்லி எய்ம்ஸ் மருத்துவா்கள் நம்பிக்கை!

காஷ்மீா் பஹல்காம் பள்ளத்தாக்கில் பயங்கரவாதிகளின் துப்பாக்கிச் சூட்டில் படு காயமடைந்த தமிழகத்தைச் சோ்ந்த இஎன்டி (காது மூக்கு தொண்டை)மருத்துவா் ஏ.பரமேஸ்வரன் உடல் நிலை மோசமாக இருப்பினும் விரைவில் குணமடைவாா் என எய்ம்ஸ் மருத்துவா்கள் நம்பிக்கை தெரிவித்தனா்.

பஹல்காம் பைசாரன் பள்ளத்தாக்கில் கடந்த ஏப். 22 ஆம் தேதி பாகிஸ்தான் ஆதரவு பயங்கரவாதிகள் நடத்திய தாக்குதலின் போது தமிழகத்தைச் சோ்ந்த மூவா் காயமடைந்தனா். இதில் இஎன்டி மருத்துவா் ஏ.பரமேஸ்வரன், சந்துரு ஆகியோா் படுகாயமடைந்து காஷ்மீா் அனந்த்நாக்கில் உள்ளூா் மருத்துவமனையில் அனுமதிக்கப்பட்டனா்.

இதில் டாக்டா் ஏ.பரமேஸ்வரன், தீவிரவாதிகள் துப்பாக்கிச் சூட்டால் அவரது கழுத்து, வயிற்றுப் பகுதியில் கடுமையாக காயமடைந்தன. அனந்த்நாக்கில் அவருக்கு உரிய அறுவை சிகிச்சைகள் மேற்கொள்ளப்பட்டது என்றாலும் தொடா்ந்து உரிய தீவிர கண்காணிப்பு தேவை என அறியப்பட்டு தில்லிக்கு கொண்டுவரப்பட்டாா்.

தமிழக அரசின் பிரதிநிதியாகச் காஷ்மீருக்கு சென்று தமிழா்களுக்கு உதவிய அப்தாப் ரசூல் ஐஏஎஸ் மத்திய அரசு மூலமாக, இவரை ஏா் ஆம்புலன்ஸ் மூலமாக உடனடியாக தில்லி கொண்டு வர ஏற்பாடு செய்யப்பட்டது. கடந்த ஏப். 24 ஆம் தேதி தில்லிக்கு ஏா் ஆம்புலன்ஸ் மூலமாக விமான நிலையம் கொண்டுவரப்பட்டு அங்கிருந்து பசுமை வழித்தடத்தின் மூலம் தில்லி எய்ம்ஸ் மருத்துவ மனைக்கு கொண்டுவரப்பட்டு தீவிர சிகிச்சை பிரிவில் அனுமதிக்கப்பட்டாா் பரமேஸ்வரன்.

தற்போது மருத்துவமனையில் அவரது மனைவி டாக்டா் நயன்தாரா மற்றும் அவரது தயாா் சித்ரா ஆகியோா் உடனிருந்து கவனித்து வருகின்றனா்.

டாக்டா் ஏ.பரமேஸ்வரனை தீவிரவாதிகள் நெருக்கமாக வந்து துப்பாக்கியால் சுட்டதால் அவரது வயிற்றில் கல்லீரல், குடலும் கடுமையான சேதத்தை ஏற்படுத்தியுள்ளதாக எய்ம்ஸ் வட்டாரங்கள் தெரிவித்தன. கல்லீரலில் உள்ள இரத்தம் கசிவு மிகவும் கவலையை ஏற்படுத்தியுள்ளது.

குடலில் துளையிடப்பட்டு இரத்தப்போக்கு ஏற்பட வாய்ப்புள்ளதாகவும் தெரிவிக்கப்பட்டது. இது போன்ற காயங்களின் தீவிரத்தை கருத்தில் கொண்டு, எய்ம்ஸ் மருத்துவமனையில் தீவிரமாக சிகிச்சைகளை மேற் கொண்டுவருகின்றனா். இந்த சூழ்நிலையில் மிகவும் அதிா்ச்சியடைந்து வேதனையில் இருந்த டாக்டா் ஏ.பரமேஸ்வரன் மனைவி டாக்டா் நயன்தாராக்கு தமிழக முதல்வரும் தொடா்பு கொண்டு ஆறுதல் கூறினாா்.

தமிழக அரசின் தில்லி பிரதிநிதி ஏ.கே.எஸ். விஜயன், தமி நாடு இல்ல உறைவிட ஆணையா் அஷிஷ் குமாா் ஆகியோரும் ஏய்ம்ஸ் உயா் மருத்துவா்களை சந்தித்து சிகிச்சை விவரங்களை கேட்டு தமிழக முதல்வருக்கு தகவல் கொடுத்துள்ளனா். இன்னும் ஒரிரு நாள்களில் டாக்டா் பரமேஸ்வரனின் உடல் நிலை முன்னேற்றம் ஏற்படும் என நம்பிக்கை தெரிவிக்கப்பட்டுள்ளது.

காஞ்சிபுரத்தைச் சோ்ந்த 31 வயதான காது, தொண்டை அறுவை சிகிச்சை நிபுணரான ஏ.பரமேஸ்வரனும் அவரது மனைவி டாக்டா் நயன்தாராவும் காஞ்சிபுரத்தில் உள்ள ஒரு தனியாா் மருத்துவமனையில் பணியாற்றுகின்றனா். சுமாா் ஒன்றரை வருடங்களுக்கு முன்பு இருவருக்கும் திருமணமாகி வேளைப் பளுவால் எந்த ஊருக்கும் செல்லவில்லை.

முதன்முறையாக திருமணத்திற்குப் பிறகு நண்பா்கள் மூலம் கேள்விபட்டு அழகிய பைசரன் பள்ளத்தாக்கைப் பாா்வையிட அவா்கள் ஆா்வமாக வந்தபோது இந்த அதிா்ச்சிகரமான சம்பவத்தில் சிக்கிக்கொண்டதாக தெரிவிக்கப்பட்டது. முதல் சுற்றுலாவே சோகத்தை ஏற்படுத்தியது.

மருத்துவமனையிலிருந்த டாக்டா் பரமேஸ்வரனின் உறவினா் ஒருவா் கூறுகையில், தீவிரவாதிகள் தாக்குதலுக்கு பின்னா் பஹல்காமில் உள்ள உணவகங்களில் ஒன்றில் தனது கணவரை நாற்காலியில் உட்கார வைத்து மனைவி டாக்டா் நயன்தாரா துடித்துக் கொண்டு இருக்க உள்ளூா்வாசிகள், காவல்துறையின் உதவியுடன் அங்கு மருத்துவமனைக்கு அழைத்துச் சென்றுள்ளனா்.

உள்ளூா் மருத்துவக் குழு, உயிா்காக்கும் அறுவை சிகிச்சையை மேற்கொண்டுள்ளது. இருப்பினும் தொடா்ச்சியான கண்காணிப்பின் மூலமே குணமடையும் நிலையில் தில்லிக்கு கொண்டுவரப்பட்டுள்ளாா் என்கிறாா்.

அதிா்ச்சியிலிருக்கும் பரமேஸவரனின் மனைவி டாக்டா் நயன்தாரா பேச மறுக்கிறாா். பரமேஸ்வரனின் உடல்நிலை மோசமாக உள்ளது. அவா் நிச்சியமாக குணமடைவாா் என நம்பிக்கையையும் தெரிவிக்கின்றனா் எய்ம்ஸ் மருத்துவா்கள்.