பாக்ஸிங் டே டெஸ்ட்: தீவிர வலைப்பயிற்சியில் இந்திய பந்துவீச்சாளர்கள் (விடியோ)!

ஆஸ்திரேலியாவுக்கு எதிரான பாக்ஸிங் டே டெஸ்ட் போட்டிக்காக இந்திய அணியின் பந்துவீச்சாளர்கள் தீவிரமாக வலைப்பயிற்சி மேற்கொண்டு வருகின்றனர்.

ஆஸ்திரேலியாவுக்கு எதிரான பார்டர் - கவாஸ்கர் டெஸ்ட் தொடரை இந்திய அணி மிகவும் வலுவாக தொடங்கியது. பெர்த்தில் நடைபெற்ற முதல் டெஸ்ட் போட்டியில் இந்திய அணி, ஆஸ்திரேலியாவை 295 ரன்கள் வித்தியாசத்தில் வீழ்த்தியது. இருப்பினும், அடிலெய்டில் நடைபெற்ற பிங்க் பந்து போட்டியில் இந்திய அணி 10 விக்கெட்டுகள் வித்தியாசத்தில் ஆஸ்திரேலியாவிடம் மோசமான தோல்வியைத் தழுவியது. இரு அணிகளுக்கும் இடையிலான பிரிஸ்பேனில் நடைபெற்ற மூன்றாவது டெஸ்ட் போட்டி மழை காரணமாக டிராவில் முடிந்தது.

இதையும் படிக்க: இந்திய அணியின் பந்துவீச்சாளர்களுக்கு எதிராக திட்டங்கள் உள்ளன: இளம் ஆஸி. வீரர்

விடியோ வெளியிட்ட பிசிசிஐ

இந்தியா - ஆஸ்திரேலிய அணிகளுக்கு இடையிலான நான்காவது டெஸ்ட் போட்டி (பாக்ஸிங் டே டெஸ்ட்) டிசம்பர் 26 ஆம் தேதி மெல்போர்னில் தொடங்குகிறது. கடைசி இரண்டு போட்டிகளும் மிகவும் முக்கியம் என்பதால், இந்திய அணியின் பந்துவீச்சாளர்கள் பாக்ஸிங் டே டெஸ்ட் போட்டிக்காக தீவிர வலைப்பயிற்சியில் ஈடுபட்டு வருகின்றனர்.

இந்திய அணியின் பந்துவீச்சாளர்கள் பந்துவீச்சு பயிற்சியில் ஈடுபட்டுள்ள விடியோவை பிசிசிஐ அதன் சமூக வலைத்தளப் பக்கத்தில் பதிவிட்டுள்ளது. அந்த விடியோவுக்கு, கடின உழைப்புக்கு மாற்று வேறு இல்லை. ஆடுகளத்துக்கு வெளியே வீரர்கள் மேற்கொள்ளும் கடின உழைப்பு அவர்களுக்கு போட்டியின்போது, வெற்றியை பெற்றுத் தருகிறது. இந்திய அணியின் பந்துவீச்சாளர்கள் பாக்ஸிங் டே டெஸ்ட் போட்டிக்கு தயாராகி வருகிறார்கள் என தலைப்பிடப்பட்டுள்ளது.

அந்த விடியோவில், இந்திய அணியின் வேகப் பந்துவீச்சாளர்களான ஜஸ்பிரித் பும்ரா, முகமது சிராஜ், ஆகாஷ் தீப், ஹர்ஷித் ராணா மற்றும் யஷ் தயாள் ஆகியோர் தலைமைப் பயிற்சியாளர் கௌதம் கம்பீர் முன்னிலையில் தீவிர பந்துவீச்சு பயிற்சி மேற்கொள்வது தெரிகிறது.

இதையும் படிக்க: பாக்ஸிங் டே டெஸ்ட்டில் விராட் கோலி சிறப்பாக செயல்படுவார்; முன்னாள் தலைமைப் பயிற்சியாளர் நம்பிக்கை!

உலக டெஸ்ட் சாம்பியன்ஷிப் இறுதிப்போட்டிக்குத் தகுதி பெற பார்டர் - கவாஸ்கர் டெஸ்ட் தொடரின் கடைசி இரண்டு போட்டிகளில் வெற்றி பெறுவது இரு அணிகளுக்குமே மிகவும் முக்கியம் என்பது குறிப்பிடத்தக்கது.