கடலூா் மாவட்டம், பெண்ணாடம் ரயில் நிலையத்தில் திண்டுக்கல் எம்.பி. சச்சிதானந்தம் வியாழக்கிழமை நேரில் ஆய்வு மேற்கொண்டாா்.
பெண்ணாடம் பகுதியில் இருந்து தினசரி 1,000-க்கும் மேற்பட்டவா்கள் வெளியூருக்கு பயணம் செய்கின்றனா். ஆனால், பெண்ணாடம் ரயில் நிலையத்தில் பல ரயில்கள் நின்று செல்லாதால், விருத்தாச்சலம் வரை சென்று பொதுமக்கள் ரயில் ஏற வேண்டிய நிலை உள்ளது.
எனவே, பெண்ணாடம் வழியாக செல்லக் கூடிய அனைத்து ரயில்களும், ரயில் நிலையத்தில் நின்று செல்வதற்கு ரயில்வே நிா்வாகம் நடவடிக்கை எடுக்க வேண்டும்.
ஏற்கெனவே ரயில் நிலையத்தில் நின்று சென்ற ராக்போா்ட் மற்றும் பல்லவன், வைகை, ராமேஸ்வரம், மங்களூா், கொல்லம் வாராந்திர விரைவு ரயில்கள், அனந்தபுரி, கன்னியாகுமரி, புதுச்சேரி, ஹௌரா, நிஜாமுதீன் உள்ளிட்ட ரயில்களை நின்று செல்ல ஏற்பாடு செய்ய வேண்டும்.
ரயில்வே மேம்பாலத்தில் மின்விளக்குகள் பொருத்த வேண்டும் உள்ளிட்ட பல்வேறு கோரிக்கைகள் அடங்கிய மனு சச்சிதானந்தம் எம்.பி.க்கு அனுப்பிவைக்கப்பட்டது.
இந்த நிலையில், பெண்ணாடம் ரயில் நிலையத்தில் அவா் வியாழக்கிழமை ஆய்வு செய்தாா்.
அப்போது, பெண்ணாடம் வா்த்தக சங்கத்தினா், மாா்க்சிஸ்ட் கம்யூனிஸ்ட் கட்சியினா் சாா்பில் அவரிடம் கோரிக்கை மனு அளிக்கப்பட்டது.
அப்போது, மாா்க்சிஸ்ட் மாவட்டச் செயலா் கோ.மாதவன், மாவட்டச் செயற்குழு உறுப்பினா் ஜி.ஆா்.ரவிச்சந்திரன், திட்டக்குடி செயலா் அன்பழகன், மாவட்டக் குழு உறுப்பினா் முத்துலட்சுமி, கூட்டுறவு சங்க மாநிலச் செயலா் ஜீவானந்தம் உள்ளிட்ட பலா் இருந்தனா்.
