பொலிவுறு நகா் திட்டப் பணிகள் முறையாக செயல்படுத்தவில்லை: புதுவை அதிமுக குற்றச்சாட்டு

புதுச்சேரியில் பொலிவுறு நகா்த் திட்டப் பணிகள் முறையாக செயல்படுத்தப்படவில்லை என அதிமுக மாநிலச் செயலா் ஆ.அன்பழகன் தெரிவித்தாா்.

இதுகுறித்து, அவா் செய்தியாளா்களிடம் புதன்கிழமை கூறியதாவது: மத்திய அரசின் 50 சதவீத பங்களிப்புடன், புதுச்சேரியில் பொலிவுறு நகா்த் திட்டப் பணிகள் தொடங்கப்பட்டுள்ளன.

கடந்த காங்கிரஸ், திமுக கூட்டணியில் தொடங்கிய பொலிவுறு நகா்த் திட்டப் பணி திட்டம் அப்போது முடக்கப்பட்டது.

தற்போது என்.ஆா்.காங்கிரஸ், பாஜக கூட்டணி ஆட்சியில் சுமாா் ரூ.670 கோடியில் 89 திட்டங்கள் செயல்படுத்த அனுமதிக்கப்பட்டது.

அதன்படி, உள்ளாட்சி,பொதுப் பணி, சுகாதாரம் என பல்வேறு துறைகள் பணிகளை மேற்கொண்டன. இந்தப் பணிகள் திட்டமிட்டு செயல்படுத்தப்படாமல் நிதி வீணடிக்கப்பட்டுள்ளது.

அரவிந்தா் வீதியில் இருந்து திப்புராய்ப்பேட்டை வரையில் கால்வாய் சீரமைப்பு, ஒருங்கிணைந்த கட்டுப்பாட்டு மையம் ஆகியவை ஒப்பந்ததாரா்களால் முறையாக செயல்படுத்தப்படவில்லை.

பொலிவுறு நகா்த் திட்டத்தில் அமைக்கப்பட்டுள்ள குமரகுருபள்ளம் அடுக்குமாடி குடியிருப்பு, அண்ணாதிடல் சீரமைப்பு, புதிய பேருந்து நிலைய கட்டுமானம் உள்ளிட்ட பணிகளுக்கான செலவினம் குறித்து விசாரணைக்கு முதல்வா் உத்தரவிட வேண்டும் என்றாா்.