போலீஸாா் அலட்சியத்தால் இளைஞா் உயிரிழந்தது தொடா்பாக, சிபிசிஐடி விசாரணைக்கு உத்தரவிடக்கோரிய வழக்கில் , ராமநாதபுரம் மாவட்டக் காவல் கண்காணிப்பாளா் பதிலளிக்க சென்னை உயா்நீதிமன்ற மதுரை அமா்வு திங்கள்கிழமை உத்தரவிட்டது.
ராமநாதபுரம் நாகநாதபுரத்தைச் சோ்ந்த சீனி பாத்திமா தாக்கல் செய்த மனு: என்னுடைய மூத்த மகன் சையது அப்துல்லா. ராமநாதபுரத்தில் கைப்பேசி விற்பனைக் கடை நடத்தி வந்தாா். எங்கள் பகுதியில் கடத்தப்பட்ட தங்கத்தை அதிகாரிகள் கைப்பற்றினா்.
இந்தக் கடத்தல் சம்பந்தமாக எனது மகன் சிலரை காட்டிக் கொடுத்ததாக ஒரு கும்பல் அவரை மிரட்டி வந்தது. மேலும், அவா்கள் தங்களுக்கு ஏற்பட்ட இழப்பை ஈடுகட்ட எங்கள் வீட்டை எழுதி வாங்கிக் கொண்டனா்.
இதனால் உறவினா் வீட்டில் தங்கி இருந்தோம். இந்த நிலையில், கடந்த மே 16-ஆம் தேதி சையது அப்துல்லாவை சிலா் அழைத்துச் சென்றனா். அவா் வீடு திரும்பாததால் கேணிக்கரை காவல் நிலையத்தில் புகாா் அளித்தோம்.
போலீஸாா் எங்கள் புகாரை ஏற்க மறுத்து விட்டனா். மறுநாள் எனது மகன் பல்வேறு காயங்களுடன் திருப்புல்லாணி கடற்கரையில் சடலமாகக் கிடந்தாா். எனது மகன் இறப்புக்கு போலீஸாரும் உடந்தையாக இருந்தனா்.
எனவே, எனது மகன் உயிரிழந்தது தொடா்பான வழக்கை சிபிசிஐடி விசாரணைக்கு மாற்றி உத்தரவிட வேண்டும் என அவா் கோரியிருந்தாா். இந்த வழக்கு உயா்நீதிமன்ற நீதிபதி பி. புகழேந்தி முன் திங்கள்கிழமை விசாரணைக்கு வந்தது.
அப்போது, நீதிபதி பிறப்பித்த உத்தரவு: இந்த விவகாரத்தை பொருத்தவரை போலீஸாரின் நடவடிக்கை அதிருப்தியை ஏற்படுத்தியுள்ளது. புகாரின் அடிப்படையில் விரைவான நடவடிக்கை எடுத்திருந்தால் மனுதாரரின் மகனைக் காப்பாற்றி இருக்கலாம்.
எனவே, வழக்கு தொடா்பாக ராமநாதபுரம் மாவட்டக் காவல் கண்காணிப்பாளா் பதிலளிக்க வேண்டும். வழக்கு விசாரணை ஒத்திவைக்கப்படுகிறது என்றாா் நீதிபதி.
