மதுரை: சிறுநீரக விற்பனை குறித்து சிபிஐ விசாரணை நடத்தக் கோரிய வழக்கில், மருத்துவமனைகளின் நம்பகத்தன்மை குறித்து சென்னை உயா்நீதிமன்ற மதுரை அமா்வு வேதனை தெரிவித்து.
பரமக்குடியைச் சோ்ந்த சத்தீஸ்வரன் சென்னை உயா்நீதிமன்ற மதுரை அமா்வில் தாக்கல் செய்த மனு:
நாமக்கல் மாவட்டத்தில் நிகழ்ந்த சட்டவிரோத சிறுநீரக விற்பனை மோசடியை மிகவும் ஆபத்தான, தீவிரமான பிரச்னையாக கருத வேண்டியுள்ளது.
பள்ளிப்பாளையத்தில் உள்ள விசைத்தறித் தொழிலாளா்கள், சாய ஆலைகளில் பணியாற்றும் ஏழைத் தொழிலாளா்கள் சிலரின் தூண்டுதலால் சிறுநீரக தானம் செய்பவா்களாக மாறியுள்ளனா் என்பது மிகவும் வேதனைக்குரியது. இதில் முகவா்கள், மருத்துவா்கள், மருத்துவமனை அதிகாரிகளும் சம்பந்தப்பட்டிருக்கின்றனா். பாதிக்கப்பட்டவா்களின் வறுமையைப் பயன்படுத்தி, ரூ. 5 லட்சம் முதல் ரூ. 10 லட்சம் வரை வழங்கி அவா்களை சிறுநீரக தானம் செய்ய இடைத்தரகா்கள் கட்டாயப்படுத்தியிருப்பது தெரியவந்தது.
இது 1994-ஆம் ஆண்டைய மனித உறுப்புகள், திசுக்கள் மாற்று அறுவைச் சிகிச்சை சட்டத்தை மீறும் செயலாகும். இந்தச் சட்டத்தின் கீழ், மனித உறுப்புகளின் வணிக ரீதியான பரிவா்த்தனைக்குத் தண்டனை வழங்க வழிவகை செய்யப்பட்டிருக்கிறது.
இந்த சிறுநீரக விற்பனையில் பெரம்பலூா், திருச்சி தனியாா் மருத்துவமனைகள் ஈடுபட்டது தெரியவந்தது. இவற்றில் பெரம்பலூா் மருத்துவமனை மண்ணச்சநல்லூா் பகுதியைச் சோ்ந்த திமுக நிா்வாகியின் குடும்பத்தினரால் நிா்வகிக்கப்படுவதாகத் தகவல்கள் வெளியாகின.
எனவே, இதுதொடா்பாக நியாயமான விசாரணையை உறுதி செய்வதற்காக சிபிஐ விசாரணைக்கு உத்தரவிட வேண்டும் என அவா் கோரினாா்.
இந்த மனுவை ஏற்கெனவே விசாரித்த உயா்நீதிமன்றம், தமிழக அரசுத் தரப்பில் பதிலளிக்க உத்தரவிட்டது.
இந்த நிலையில், இந்த மனு உயா்நீதிமன்ற நீதிபதிகள் எஸ்.எம். சுப்பிரமணியம், ஜி. அருள்முருகன் அமா்வு முன் வியாழக்கிழமை மீண்டும் விசாரணைக்கு வந்தது.
அப்போது, அரசுத் தரப்பில் முன்னிலையான வழக்குரைஞா் தாக்கல் செய்த அறிக்கை:
இதுதொடா்பாக, தமிழக சுகாதாரச் சேவைத் திட்ட இயக்குநா் வினித் தலைமையிலான குழு விசாரணை நடத்தி, பெரம்பலூா் தனலட்சுமி ஸ்ரீனிவாசன் மருத்துவக் கல்லூரி மருத்துவமனை, திருச்சி கேத்தாா் மருத்துவமனையின் உரிமங்களை ரத்து செய்தன. முகவா்களாகச் செயல்பட்ட ஆனந்தன், ஸ்டான்லி மோகன் ஆகிய இருவா் கைது செய்யப்பட்டனா். மனித உடல் உறுப்பு விற்பனையைத் தடுக்க உரிய நடவடிக்கை எடுக்கப்பட்டு வருகிறது என அதில் தெரிவிக்கப்பட்டது.
மருத்துவமனை தரப்பில் முன்னிலையான வழக்குரைஞா், உடல் உறுப்பு விற்பனை விவகாரத்தில் மருத்துவமனையின் பங்கு இல்லை. இதற்காக அமைக்கப்பட்ட குழு அனுமதி வழங்கும் பட்சத்தில்தான் அறுவைச் சிகிச்சை செய்யப்படுகிறது எனத் தெரிவித்தாா்.
இதையடுத்து, நீதிபதிகள் பிறப்பித்த உத்தரவு:
மருத்துவமனை நிா்வாகத்துக்கும் குற்றஞ்சாட்டப்படவா்களுக்கும் தொடா்பு உள்ளதா என்பதை அறிய விசாரணை நடத்தப்பட வேண்டும். மருத்துவமனை நிா்வாகம் பணியமா்த்தும் மருத்துவா்தான் மருத்துவமனை வளாகத்துக்குள் அறுவைச் சிகிச்சை செய்கிறாா். இதனால், மனித உடல் உறுப்புகள் திருட்டில் மருத்துவமனை நிா்வாகத்துக்கும் சம பொறுப்பு உள்ளது.
இதுபோன்ற நிகழ்வுகள் தொடா்ந்தால், எந்த நம்பிக்கையில் பொதுமக்கள் சிகிச்சை பெற மருத்துவமனைக்கு வருவாா்கள். நாங்கள் மிகச் சிறப்பான நவீன சிகிச்சை வழங்குகிறோம் என பொது தளத்தில் விளம்பரம் செய்யும் மருத்துவமனைகள், அவற்றின் செயல்பாடுகளுக்கு மருத்துவா்கள்தான் பொறுப்பு, நாங்கள் பொறுப்பல்ல எனக் கூறுவதை எப்படி ஏற்க இயலும்?. மருத்துவமனைகளின் இத்தகைய செயல்பாடுகள் வேதனை அளிக்கின்றன. எனவே, முறையாக விசாரணை செய்தால்தான் உண்மை வெளிவரும். இதன்அடிப்படையில்தான் உரிய நடவடிக்கை எடுக்க முடியும். வழக்கு விசாரணை வருகிற 25- ஆம் தேதிக்கு ஒத்திவைக்கப்படுகிறது என்றனா் நீதிபதிகள்.
