மழையால் பாதிக்கப்பட்ட மக்களுக்கு ரூ. 6 ஆயிரம் நிவாரணம் வழங்க வேண்டும்

விழுப்புரம், கள்ளக்குறிச்சி உள்ளிட்ட வட மாவட்டங்களில் மழையால் பாதிக்கப்பட்ட மக்களுக்கு குடும்பத்துக்கு ரூ. 6 ஆயிரம் நிவாரணம் வழங்க வேண்டும் என பாமக கௌரவத் தலைவா் ஜி.கே.மணி கூறினாா்.

சேலத்தில் ஒருங்கிணைந்த மாவட்ட பாமக ஆலோசனைக் கூட்டம் இரா.அருள் எம்எல்ஏ தலைமையில் சனிக்கிழமை நடைபெற்றது. கூட்டத்தில் கட்சியின் கௌரவத் தலைவா் ஜி.கே.மணி பங்கேற்று, திருவண்ணாமலையில் நடைபெறவுள்ள உழவா் பேரியக்க மாநாடு குறித்து கட்சி நிா்வாகிகளுக்கு ஆலோசனை வழங்கினாா். பின்னா் செய்தியாளா்களிடம் அவா் கூறியதாவது:

அண்மையில் பெய்த மழை வெள்ளத்தால் திருவண்ணாமலை, கடலூா், விழுப்புரம் உள்ளிட்ட மாவட்டங்கள் மிகப்பெரிய பாதிப்பை சந்தித்துள்ளன. கடந்த 2023-ஆம் ஆண்டு சென்னையில் மழை வெள்ளத்தால் பாதிக்கப்பட்டவா்களுக்கு ரூ. 6 ஆயிரம் நிவாரணம் வழங்கினா். ஆனால் பிற மாவட்டங்களுக்கு ரூ. 2 ஆயிரம்தான் அறிவிக்கப்பட்டுள்ளது. அரசு அறிவித்த ரூ. 2 ஆயிரம் தொகையும் அனைவருக்கும் சென்றடையவில்லை. எனவே, வட மாவட்டங்களில் மழை வெள்ளத்தால் பாதிக்கப்பட்டவா்களுக்கு ரேஷன் அட்டைக்கு ரூ. 6 ஆயிரம் வழங்க வேண்டும்.

நாட்டின் முதுகெலும்பு விவசாயம் தான்; ஆனால், விவசாயிகளின் நிலையோ மிகவும் பரிதாபமாக உள்ளது. விவசாயத்துக்கு ஆதாரமான நீா், வீணாக கடலில் கலக்கிறது. மேட்டூா் அணையில் இருந்து வெளியேறும் தண்ணீரை வீணாக்காமல் சேலம் மாவட்டம் முழுவதும் பயன்பெறும் வகையில் ஏரிகளில் நிரப்ப வேண்டும். தருமபுரி மாவட்டம் செழிக்க காவிரி உபரிநீா் திட்டத்தை செயல்படுத்த வேண்டும்.

அனைத்து துறையிலும் காலியாக உள்ள பணியிடங்களை உடனடியாக நிரப்ப வேண்டும். அரசு திட்டங்கள் மக்களிடம் விரைவாக சென்றடைய பெரிய மாவட்டங்களைப் பிரிக்க வேண்டும். மத்திய அரசின் ஒரே நாடு; ஒரே தோ்தல் திட்டத்துக்கான நோக்கம் சரியாக இருந்தாலும், அதனை நடைமுறைப்படுத்துவதில் பல்வேறு சிக்கல்கள் உள்ளன என்றாா்.

இதில், பாமக சேலம் மேற்கு மாவட்டச் செயலாளா் சதாசிவம் எம்எல்ஏ, மாநில வன்னியா் சங்கச் செயலாளா் மு.காா்த்தி, மாநகர மாவட்டத் தலைவா் கதிா் ராஜரத்தினம், மாவட்டச் செயலாளா்கள் நாராயணன், செல்வகுமாா், ஜெயபிரகாஷ் உள்ளிட்ட நிா்வாகிகள் கலந்துகொண்டனா்.