அண்ணா பல்கலைக்கழக மாணவி பாலியல் வன்கொடுமை விவகாரத்தில் கட்சிகள் அரசியல் செய்வது ஏன் என சென்னை உயா்நீதிமன்றம் கேள்வி எழுப்பியது.
இந்த விஷயத்தில் அரசியல் கட்சிகள் கண்ணியத்துடன் செயல்பட வேண்டும் எனவும் உயா்நீதிமன்றம் கருத்து தெரிவித்தது.
அண்ணா பல்கலைக்கழக மாணவி கடந்த டிச. 23-ஆம் தேதி பாலியல் வன்கொடுமைக்கு உள்ளாக்கப்பட்ட சம்பவத்தில் ஞானசேகரன் என்பவா் கைது செய்யப்பட்டு சிறையில் அடைக்கப்பட்டுள்ள நிலையில், சென்னை உயா்நீதிமன்றம் தாமாக முன்வந்து இந்த வழக்கை விசாரணைக்கு எடுத்துள்ளது. தொடா்ந்து, மாணவி பாலியல் வன்கொடுமை வழக்கில் மூன்று பெண் ஐபிஎஸ் அதிகாரிகள் கொண்ட சிறப்புக் குழு விசாரணை செய்யவும், மாணவிக்கு ரூ.25 லட்சம் இழப்பீடு வழங்கவும் சென்னை உயா்நீதிமன்றம் உத்தரவிட்டுள்ளது.
மாணவி பாலியல் வன்கொடுமை தொடா்பாக அதிமுக, பாஜக உள்ளிட்ட கட்சிகள் ஏற்கெனவே போராட்டங்களை நடத்தின. இதற்கிடையே, வன்கொடுமை செய்யப்பட்ட விவகாரத்தில் மாணவிக்கு நீதி மற்றும் பெண்களுக்கு பாதுகாப்பு கோரி பாமக மகளிரணி சாா்பில் போராட்டம் நடத்த அனுமதி கோரி காவல் துறையிடம் மனு அளித்தனா்.
ஆனால், போராட்டத்துக்கு அனுமதி மறுத்த காவல் துறை, பாமகவின் மனுவை நிராகரித்தது. இதையடுத்து, போராட்டம் நடத்த அனுமதி வழங்க உத்தரவிக் கோரி பாமக மகளிரணி சாா்பில், சென்னை உயா்நீதிமன்ற நீதிபதி வேல்முருகன் முன் வியாழக்கிழமை முறையீடு செய்யப்பட்டது.
அனுமதி மறுப்பு: இந்த முறையீட்டை விசாரித்த நீதிபதி, பாமக போராட்டத்துக்கு அனுமதி வழங்க உத்தரவிட முடியாது எனத் தெரிவித்தாா்.
இதைத் தொடா்ந்து, நீதிபதி மேலும் கூறியதாவது: பொது நோக்கத்துக்காகப் போராட்டம் நடத்தாமல், பத்திரிகை விளம்பரத்துக்காக போராட்டம் நடத்தப்படுகிறது. பத்திரிகைகள் தங்கள் கடமையை உணா்ந்து செயல்பட வேண்டும்.
ஆண், பெண் என்ற பாரபட்சம் நிலவும் இந்தச் சமுதாயத்தில் வாழ்வதே அவமானமாக அனைவரும் நினைக்க வேண்டும். இந்த விவகாரத்தில் கட்சிகள் அரசியல் செய்வது ஏன்? இதில் அரசியல் செய்யாமல் கண்ணியத்துடன் செயல்பட வேண்டும்.
மேலும், பெண்களுக்கான பாதுகாப்பு இன்றளவும் மறுக்கப்படுகிறது. இந்த நூற்றாண்டிலும் பெண்களுக்கு எதிரான பாலியல் வன்கொடுமை தொடா்வது குறித்து நாம் அனைவரும் வெட்கப்பட வேண்டும் எனத் தெரிவித்தாா்.
