"மிட்செல் ஸ்டார்க்குக்கு தமிழ் தெரியுமா..." - ஆஸ்திரேலியர்களுக்கு கோச்சிங் செய்த அஷ்வின்?

இந்திய அணியின் முன்னாள் சுழற்பந்துவீச்சாளர் ரவிச்சந்திரன் அஷ்வின் மற்றும் முன்னாள் தலைமை பயிற்சியாளர் ராகுல் டிராவிட் இருவரும் 2023 பார்டர்-கவாஸ்கர் டிராபியில் நடந்த சர்ச்சைக்குரிய தருணத்தைப் பற்றி அஸ்வினின் யூடியூப் சேனலில் பேசியுள்ளனர்.

2023ல் நடந்தது என்ன?

அப்போது அஷ்வின் தனது தமிழ் மொழி யூடியூப் சேனலில், ஆஸ்திரேலிய வீரர்களுக்கு உதவுவதாகக் குற்றம்சாட்டப்பட்டது.

2023 பார்டர்-கவாஸ்கர் டிராபியில், இரண்டாவது டெஸ்ட் போட்டியில் ஆஸ்திரேலிய அணியினர் தோல்வியைத் தழுவியிருந்தனர். தொடர்ந்து அஷ்வின் ஸ்பின் பௌலிங்கை விளையாடுவது எப்படி என அவரது யூடியுப் சேனலில் பேசியிருந்தார்.

இந்தூரில் நடந்த 3வது டெஸ்ட் போட்டியில் இந்திய அணி தோல்வியைத் தழுவியதனால் அஷ்வினை ரசிகர்கள் கடுமையாக விமர்சித்தனர். பின்னர் அஷ்வின் சேனல் வீடியோவின் தம்ப்நைலை மாற்றியது. அப்போதே விளக்கமும் அளித்தார் அஷ்வின்.

"அஷ்வின் உங்களை விட சிறப்பாக பயிற்சி அளிக்கிறார்" - டிராவிட் எதிர்கொண்ட விமர்சனம்

இதுகுறித்துப் பேசும்போது ராகுல் டிராவிட், "நீ ஆஸ்திரேலிய அணிக்கு கூட பயிற்சி அளித்திருக்கிறாய். எனக்கு ஒரு வீடியோ கிளிப் அனுப்பப்பட்டது. துரதிர்ஷ்டவசமாக, அது தமிழில் இருந்தது. அதுதான் நான் பார்த்த ஒன்று.

எனக்கு தெரிந்த கொஞ்ச தமிழை வைத்து அந்த வீடியோவைப் பார்க்கும்போது, நீ ஆஸ்திரேலியா தொடருக்கு நடுவே அந்த அணிக்கு ஸ்பின் விளையாவுவது எப்படி என கோசிங் செய்வது தெரிந்தது. நான் அப்போது 'இன்னும் தொடர் முடியவில்லையே அஷ்வின்' என நினைத்துக்கொண்டிருந்தேன்" என்றார்.

அதற்கு பதிலளித்த அஷ்வின், "ஒருவேளை எனக்கு ஸ்பின்னை எப்படி ஆட வேண்டும் எனத் தெரிந்தால், நான் அதை நமது வீரர்களுக்கு சொல்லியிருப்பேனே. நான் ஏன் ஆஸ்திரேலியர்களிடம் சென்று சொல்லப்போகிறேன்" என்றார்.

பின்னர் டிராவிட் நகைச்சுவையாக, "அந்த நேரத்தில் 'அஷ்வின் உங்களை விட சிறப்பாக பயிற்சி அளிக்கிறார் - நீங்கள் என்ன செய்கிறீர்கள்?' என்று என்னை விமர்சித்தனர்" என்றார்.

மிட்செல் ஸ்டார்க்குக்கு தமிழ் தெரியுமா?

மேலும் அஷ்வின் இந்தூரில் நடந்த போட்டியில் ஸ்டார்க் உடனான உரையாடல் பற்றி பேசினார். "இந்தூர் போட்டியில் ஸ்டார்க் ஒரு பவுன்சர் வீசினார். நானா அதை அப்படியே விட்டுவிட்டேன். நாங்கள் 80/7 என்ற கணக்கில் இருந்தோம். லான்ச்க்கு செல்லும்போது ஸ்டார்க் என்னிடம் வந்து யூடியூப் வீடியோவில் சொல்லியதுபோல பவுன்சர் எப்படி அடிக்க வேண்டும் என நான் சொல்லித் தரவா?" எனக் கேட்டார்." என்றார்.

இதற்கும் நகைச்சுவையாக பதிலளித்த டிராவிட், "மிட்செல் ஸ்டார்க்குக்கு தமிழ் தெரிவது ஆச்சரியமாக இருக்கிறது. ஒருவேளை அவர்கள் இதற்காக ஒரு தமிழ் ஆளைப் பிடித்திருக்கலாம்" என்றார்.

பின்னர் அஷ்வின் அந்த வீடியோவில் சப் டைட்டில் இருந்ததாக தெளிவுபடுத்தினார்.