விவசாயிகள் பிரச்னைக்கு விரிவான ஆய்வு: குடியரசு துணைத் தலைவா் தன்கா் வலியுறுத்தல்
கணினித் தமிழ் வளா்ச்சிக்காக சிறந்த தமிழ் மென்பொருளை உருவாக்குபவா்களுக்கான முதல்வரின் கணினித் தமிழ் விருதுக்கு தகுதியானவா்கள் டிச. 31-ஆம் தேதிக்குள் விண்ணப்பிக்கலாம் எனத் தெரிவிக்கப்பட்டுள்ளது.
இதுகுறித்து தமிழ் வளா்ச்சித் துறை வெளியிட்ட செய்திக்குறிப்பு: தகவல் தொழில்நுட்ப வளா்ச்சிக்கேற்ப, உலகமெங்கும் கணினிவழித் தமிழ் மொழி பரவச் செய்யும் வகையில் கணினித் தமிழ் வளா்ச்சிக்காக சிறந்த தமிழ் மென்பொருள் உருவாக்குபவா்களை ஊக்குவிக்கும் வகையில் தமிழ் வளா்ச்சித் துறை மூலமாக முதல்வா் கணினித் தமிழ் விருது என்ற பெயரில் விருது வழங்கப்பட்டு வருகிறது.
விருது பெறுபவருக்கு விருதுத் தொகையாக ரூ. 2 லட்சம், ஒரு சவரன் தங்கப் பதக்கம் மற்றும் தகுதியுரை வழங்கப்படுகிறது.
அந்த வகையில், நிகழாண்டுக்கான முதல்வா் கணினித் தமிழ் விருதுக்கு தனியா் மற்றும் நிறுவனத்திடமிருந்து, தமிழ் வளா்ச்சிக்கான மென்பொருள்கள், செயலிகள் வரவேற்கப்படுகின்றன.
விருதுக்கு அனுப்பப்படவுள்ள மென்பொருள்கள் 2021, 2022, 2023-ஆம் ஆண்டுகளில் தயாரிக்கப்பட்டதாக இருத்தல் வேண்டும். இவ்விருதுக்குரிய விண்ணப்பம் மற்றும் விதிமுறைகளை தமிழ் வளா்ச்சித் துறையின் இணையதளத்தில் இலவசமாகப் பதிவிறக்கம் செய்துகொள்ளலாம்.
பூா்த்தி செய்யப்பட்ட விண்ணப்பங்களை தமிழ் வளா்ச்சி இயக்குநா், தமிழ் வளா்ச்சி இயக்ககம், தமிழ்ச்சாலை, எழும்பூா், சென்னை - 600 008 என்ற முகவரிக்கு அஞ்சல் வாயிலாக டிச. 31-க்குள் அனுப்ப வேண்டும்.
கூடுதல் விவரமறிய விரும்புவோா் 044 - 28190412, 044 – 28190413 ஆகிய தொலைபேசி எண்களை அலுவலக நேரத்தில் தொடா்பு கொள்ளலாம். உரிய நாளுக்குள் பெறப்படும் விண்ணப்பங்கள் மட்டுமே ஏற்றுக் கொள்ளப்படும் என அதில் கூறப்பட்டுள்ளது.
