மே மாதம் குறைந்த மொத்த விலை பணவீக்கம்

புது தில்லி: உணவுப் பொருள்கள் மற்றும் எரிபொருள் விலை குறைந்ததால் கடந்த மே மாதத்தில் மொத்த விற்பனை விலைக் குறியீடு (டபிள்யுபிஐ) அடிப்படையிலான பணவீக்கம் 14 மாதங்களில் இல்லாத அளவுக்கு 0.39 சதவீதமாகக் குறைந்துள்ளது.

இது குறித்து தொழில்துறை அமைச்சகம் திங்கள்கிழமை வெளியிட்டுள்ள அறிக்கையில் தெரிவிக்கப்பட்டுள்ளதாவது:

மொத்த விலை பணவீக்கம் கடந்த மே மாதம் 0.39 சதவீதமாகக் குறைந்துள்ளது. இது, முந்தைய 14 மாதங்கள் காணாத குறைந்தபட்ச மொத்த விலை பணவீக்கம் ஆகும். இது கடந்த ஏப்ரலில் 2.62 சதவீதமாக இருந்தது.

மே மாதத்தில் உணவுப் பொருள்களின் விலை 1.56 சதவீதம் சரிந்தது. இது ஏப்ரலில் 0.86 சதவீதமாக இருந்தது.

காய்கறிகள், வெங்காயம், உருளைக்கிழங்கு மற்றும் பருப்பு வகைகளில் எதிா்மறை பணவீக்கம் காணப்பட்டது என்று அந்த அறிக்கையில் தெரிவிக்கப்பட்டுள்ளது.