மோசடி வழக்கில் கைதான இருவா் மீது குண்டா் சட்டம்

மோசடி வழக்கில் கைதான இருவா் குண்டா் சட்டத்தில் அடைக்கப்பட்டதை அறிவுரைக் குழு உறுதி செய்தது.

கோவை ராமநாதபுரம் சுங்கத்தைச் சோ்ந்தவா் அருண்குமாா். இவரிடம் ஒரு கும்பல் ஆன்லைன் வா்த்தகத்தில் அதிக லாபம் தருவதாக கூறி ரூ.39 லட்சம் பணத்தை அண்மையில் மோசடி செய்தது. இதுகுறித்து அருண்குமாா், கோவை மாநகர சைபா் குற்றப் பிரிவு போலீஸில் புகாா் அளித்தாா்.

இதையடுத்து, இவ்வழக்கில் ஆந்திரத்தைச் சோ்ந்த ரவிசந்துரு (58), துடியலூரைச் சோ்ந்த தனசேகா் (29) ஆகிய இருவா் கைது செய்யப்பட்டனா். இவா்களிடம் இருந்து 31 காசோலைகள், 39 ஏடிஎம் அட்டைகள், 2 கைப்பேசிகள், 3 சிம்காா்டுகள் ஆகியவற்றை போலீஸாா் பறிமுதல் செய்தனா். தொடா்ந்து கடந்த மாதம் இருவரையும் குண்டா் தடுப்புப் பிரிவில் சைபா் குற்றப் பிரிவு போலீஸாா் சிறையில் அடைத்தனா்.

குண்டா் தடுப்புச் சட்டத்தில் அடைக்கப்பட்டதை எதிா்த்து இருவரும், சென்னையில் உள்ள குண்டா் தடுப்புச் சட்ட அறிவுரைக் குழுவில் முறையீடு செய்தனா். தொடா்ந்து அவா்களது மனு விசாரிக்கப்பட்டது.

அப்போது, கோவை சைபா் குற்றப் பிரிவு போலீஸாா் ஆஜராகி குண்டா் தடுப்புச் சட்டத்தில் அடைக்கப்பட்டது தொடா்பான ஆவணங்களை சமா்ப்பித்து விளக்கமளித்தனா். அதைத் தொடா்ந்து, ரவிசந்துரு, தனசேகா் ஆகியோரின் குண்டாஸை, அறிவுரைக் குழுவினா் உறுதி செய்தனா். இத்தகவலை கோவை மாநகர சைபா் குற்றப் பிரிவு போலீஸாா் வெள்ளிக்கிழமை தெரிவித்தனா்.