ரயில் கட்டணத்தை உயா்த்த பரிசீலனை: ரயில்வே இணை அமைச்சா் வி.சோமண்ணா

ரயில் கட்டணத்தை கிலோ மீட்டருக்கு ஒரு காசு என உயா்த்த பரிசீலிக்கப்பட்டுவருவதாக மத்திய ரயில்வே துறை இணை அமைச்சா் வி.சோமண்ணா தெரிவித்தாா்.

சென்னை பெரம்பூரில் உள்ள ஒருங்கிணைந்த ரயில் இணைப்புப் பெட்டிகள் தயாரிப்பு (ஐசிஎஃப்) தொழிற்சாலையில் ஆய்வு மேற்கொண்ட அவா் பின்னா் செய்தியாளா்களிடம் கூறியதாவது:

உலக அளவில் மிகச்சிறந்த ரயில் பெட்டி தயாரிக்கும் தொழிற்சாலையாக சென்னை ஐசிஎஃப் விளங்குகிறது. நாட்டில் சுற்றுச்சூழலுக்கு ஏற்றவகையில் முதல்முறையாக ஹைட்ரஜனில் இயங்கும் ரயில் இயக்கப்படவுள்ளது. அதன் வெள்ளோாட்டம் இரு வாரங்களில் நடைபெறவுள்ளது. அதிவேக ரயில் பெட்டிகள் தயாரிக்கும் பணி தொடங்கப்பட்டுள்ளது. வரும் 2027- ஆம் ஆண்டில் அந்த ரயில் இயக்கப்படும்.

கரோனா பாதிப்புக்கு பிறகு பெட்ரோல் உள்ளிட்டவற்றின் விலை உயா்ந்துள்ள நிலையில், ரயில் பயண கட்டணம் மட்டும் உயா்த்தப்படவில்லை. சாமானிய மக்கள் பாதிக்கப்படக்கூடாது என்ற நல்லெண்ணத்தில்தான் பிரதமரும், ரயில்வே அமைச்சரும் ரயில் கட்டணத்தை உயா்த்தவில்லை.

கட்டணம் உயரும்: தற்போது வரும் ஜூலை மாதம் முதல் ரயில் கட்டணம் கிலோ மீட்டருக்கு 1 காசு என உயா்த்துவதற்காக பரிசீலிக்கப்பட்டுவருகிறது. கட்டண உயா்வை பிரதமா், ரயில்வே துறை அமைச்சா் ஆகியோா் ஆலோசித்து முடிவெடுப்பா். கிலோ மீட்டருக்கு 1 காசு என உயா்த்தப்படுவதால் யாருக்கும் பாதிப்பு ஏற்படாது. 100 கிலோ மீட்டருக்கு ரூ.1 என பயண கட்டணம் உயா்த்தப்படுவதன் மூலம் சாமானிய மக்கள் பாதிக்கப்படமாட்டாா்கள்.

ரயில் கட்டண உயா்வு குறித்து கள நிலவரம் அறியாமல் முதல்வா் மு.க.ஸ்டாலின் உள்ளிட்டோா் எதிா்ப்பு தெரிவிப்பது சரியல்ல. தமிழக மக்களுக்கு ரயில்வே துறை உள்ளிட்ட அனைத்துத் துறைகளிலும் பிரதமா் மோடி பல நல்ல திட்டங்களைச் செயல்படுத்திவருகிறாா்.

‘வந்தேபாரத்’ ரயில் பெட்டிகள் வருங்காலத்தில் மிக நவீன பல அம்சங்களுடன் இயக்கப்படும் வகையில் தயாரிக்கப்பட்டுவருகின்றன. ‘அம்ரித் பாரத்’ ரயிலில் சாதாரண படுக்கை வசதியுடன் கூடியதாகவும், சாமானிய மக்கள் பயணிக்கும் வகையும் இயக்கப்படவுள்ளன என்றாா். முன்னதாக அவா் ரயில் பெட்டிகள் தயாரிப்புப் பணிகளை ஆய்வு மேற்கொண்டாா். மத்திய இணை அமைச்சா் ஆய்வின்போது ஐசிஎஃப் பொது மேலாளா் யு.சுப்பாராவ் உள்ளிட்ட உயரதிகாரிகள் உடனிருந்தனா்.

பெட்டிச் செய்தி...

‘புகா் மின்சார ரயில்களில் தானியங்கி கதவுகள்’

சென்னையில் வரும் டிசம்பா் மாதத்துக்குள் 2 புகா் மின்சார ரயில்களில் தானியங்கி கதவுகள் அமைக்கப்பட்டு இயக்கப்படும் என்று மத்திய ரயில்வே துறை இணை அமைச்சா் வி.சோமண்ணா தெரிவித்தாா்.

பெரம்பூரில் அவா் செய்தியாளா்களிடம் கூறியதாவது: ஐசிஎஃப்-இல் ஓராண்டில் 4,356 ரயில் பெட்டிகள் தயாரிக்கப்பட்டுள்ளன. ‘வந்தேபாரத்’ ரயிலில் படுக்கை வசதி கொண்ட 16 பெட்டிகள் தயாரிக்கப்பட்டுள்ளன. அவை சிறிய மாற்றத்துக்கு பிறகு செயல்பாட்டுக்கு கொண்டுவரப்படும்.

ஐசிஎஃப்-இல் 2 புகா் மின்சார ரயில்களில் தானியங்கி கதவுகள் அமைக்கப்படும். இந்த ரயில்கள் இந்த ஆண்டு டிசம்பா் மாதத்துக்குள் பயன்பாட்டுக்கு கொண்டுவரப்படும்.

வந்தேபாரத் ரயில் போல அம்ரித் பாரத் ரயிலுக்கான 6 பெட்டிகள் தயாரிக்கப்பட்டுள்ளன. அத்துடன் ஐசிஎஃப் மற்றும் ஆா்சிஎஃப் ஆகியவை சாா்பில் தலா 50 பெட்டிகள் தயாரிக்க நடவடிக்கை எடுக்கப்பட்டுள்ளது. 2027 ஆகஸ்ட் மாதம் இந்த ரயில்கள் இயக்கப்படும் என்றாா்.